Toshkent, O’zbekiston (UzDaily.uz) — Toshkentda Seul shahrida joylashgan oliy taʼlim muassasasi — Kwangwoon University‘ning O‘zbekistonda filialini tashkil etish loyihasi muhokama qilingan uchrashuv bo‘lib o‘tdi.
Tadbirda Toshkent shahar hokimligi, oliy taʼlim va investitsiyalar sohasi vakillari, shuningdek, Koreya–O‘zbekiston biznes assotsiatsiyasi vakillari ishtirok etdi.
Uchrashuvni Toshkent shahar hokimi o‘rinbosari — Raqamli rivojlanish departamenti rahbari A. Dusmuxamedov hamda O‘zbekiston Vazirlar Mahkamasining faxriy maslahatchisi, Koreya–O‘zbekiston biznes assotsiatsiyasi bosh direktori Edvard Kim o‘tkazdi.
Muhokamada Toshkent shahar oliy taʼlim, fan va innovatsiyalar boshqarmasi boshlig‘i B. Rajabov, Turin Polytechnic University in Tashkent rektori O. To‘ychiyev, Yakkasaroy tumani hokimi o‘rinbosari B. Mustafoyev hamda Toshkent shahar investitsiyalar, sanoat va savdo boshqarmasi bo‘lim boshlig‘i M. Abdurashitov ham ishtirok etdi.
Tashkil etilishi rejalashtirilayotgan filialda sunʼiy intellekt, dasturiy taʼminot, kompyuter va axborot muhandisligi, axborot konvergensiyasi hamda robototexnika yo‘nalishlarida zamonaviy taʼlim dasturlari va ilmiy-tadqiqot faoliyatini rivojlantirish ko‘zda tutilmoqda.
Loyihani amalga oshirish uchun Toshkent shahar investitsiyalar, sanoat va savdo boshqarmasi uchta ehtimoliy joyni taklif qildi.
Uchrashuv yakunlari bo‘yicha tomonlar taklif etilgan variantlarni Kwangwoon University talablarini hisobga olgan holda o‘rganish, filial uchun maqbul joyni aniqlash, taʼlim yo‘nalishlari ro‘yxatini hamda infratuzilmaga qo‘yiladigan talablarni aniqlashga kelishib oldi.
Shuningdek, ishtirokchilar loyihani amalga oshirish uchun zarur bo‘lgan keyingi bosqichlarning ketma-ketligini belgilashni rejalashtirmoqda.
