Toshkent, O’zbekiston (UzDaily.uz) — O‘zbekiston Tashqi ishlar vaziri Baxtiyor Saidov 18 sentyabr kuni Tokioda Yaponiya Xalqaro hamkorlik agentligi (JICA) prezidenti Akixiko Tanaka bilan uchrashdi.
Tomonlar qo‘shma loyihalarni amalga oshirish va amaliy hamkorlikni kengaytirish masalalarini muhokama qildi. Bu haqda O‘zbekiston Tashqi ishlar vazirligi xabar berdi.
Muzokaralarning asosiy mavzularidan biri O‘zbekiston va JICAning 2030 yilgacha bo‘lgan hamkorlik dasturida nazarda tutilgan loyihalarni amalga oshirishni jadallashtirish bo‘ldi.
Saidov va Tanaka, shuningdek, sog‘liqni saqlash sohasida hamkorlikni yana-da rivojlantirish bo‘yicha fikr almashdi. Xususiy sektorni qo‘llab-quvvatlash va taʼlim sohasidagi hamkorlikka alohida eʼtibor qaratildi.
Uchrashuv yakunlari bo‘yicha O‘zbekiston tomoni yangi loyihalar va tashabbuslar hisobiga JICA bilan amaliy hamkorlikni kengaytirishga tayyorligini bildirdi.
