Eron AQSHga Hurmuz bo‘g‘ozini ochish shartlarini maʼlum qildi

Toshkent, O’zbekiston (UzDaily.uz) — Eron AQSHga vositachilar orqali Hurmuz bo‘g‘ozini ochish uchun bajarilishi zarur bo‘lgan shartlarni yetkazdi. Bu haqda respublika Xavfsizlik kengashi kotibi Muhsin Rezoiy maʼlum qildi. Bu haqda Press TV xabar berdi.

Rezoiyning so‘zlariga ko‘ra, Tehron Vashingtondan urushni yakunlash, Eronning muzlatilgan aktivlarini qaytarish, shuningdek, butun mintaqada, jumladan, Livan va G‘azo sektorida harbiy harakatlarni to‘xtatishni talab qilmoqda.

Eron Xavfsizlik kengashi kotibi AQSH o‘z siyosatini o‘zgartirib, Tehron takliflarini qabul qilmaguncha, bo‘g‘oz ochilmasligini bildirdi.

Avvalroq Eron parlamenti Milliy xavfsizlik qo‘mitasi Hurmuz bo‘g‘ozi orqali kemalar harakatini tartibga solishni nazarda tutuvchi yangi qonun loyihasini maʼqullagan edi. Jumladan, hujjatda AQSH va Isroil kemalarining bo‘g‘oz orqali o‘tishi taqiqlanishi ko‘zda tutilgan.

Xabarda keltirilgan maʼlumotlarga ko‘ra, iyun oyi o‘rtasida Vashington va Tehron tinchlik kelishuvini tuzish jarayonini boshlashi kerak bo‘lgan memorandumni imzolagan. Biroq uch hafta o‘tib, tomonlar yana mojaroni keskinlashtirishga o‘tgan.

Avgust oyi boshida Donald Tramp kutilayotgan kelishuv munosabati bilan Eronga qarshi navbatdagi hujumlar to‘lqini bekor qilinganini maʼlum qildi.

Shuningdek, u Hurmuz bo‘g‘ozi yaqin vaqt ichida ochilishi kerakligini bildirib, bu shart bajarilmasa, hujumlarni qayta boshlash bilan tahdid qildi.