Vashingtonda qabul paytida otishma sodir bo‘ldi

Toshkent, O‘zbekiston (UzDaily.uz) — 25 aprel kechqurun Vashingtonda Oq uy muxbirlari assotsiatsiyasi qabul marosimi vaqtida otishma bilan bog‘liq hodisa yuz berdi. Unda AQSH prezidenti Donald Tramp ishtirok etgan. Bu haqda CNN telekanali xabar berdi.

Manba maʼlumotlariga ko‘ra, tadbir Washington Hill mehmonxonasida o‘tkazilgan. Otishma boshlanganidan so‘ng prezident, birinchi xonim Melaniya Tramp hamda maʼmuriyat vakillari evakuatsiya qilingan.

Hodisa metallodetektorlar bilan jihozlangan asosiy tekshiruv nuqtasi hududida sodir bo‘lgan. CNN maʼlumotiga ko‘ra, hujumchi qo‘riqchilar orqali o‘tishga uringan, ammo Sekret xizmati xodimlari tomonidan qo‘lga olingan. Agentlardan biri o‘qdan jarohat olgan va shifoxonaga yotqizilgan.

Keyinchalik huquqni muhofaza qiluvchi organlar ehtimoliy otishmachining shaxsini aniqladi. U Kaliforniya shtatida yashovchi 31 yoshli Koul Tomas Allen bo‘lib, o‘qituvchi sifatida ishlagan. Uning harakatlari sabablari hozircha ochiqlanmagan.

Keyinroq Donald Tramp Oq uyda brifing o‘tkazib, ushlangan shaxsni «juda og‘ir ruhiy holatdagi odam» deb atadi. Uning so‘zlariga ko‘ra, bir nechta turdagi qurol bilan qurollangan erkak nazorat-o‘tkazish punktidan o‘tishga uringan, ammo «juda jasur Sekret xizmati xodimlari» tomonidan to‘xtatilgan.

Nutqi davomida Tramp shuningdek 2024 yil iyul oyida Pensilvaniyada va o‘sha yil sentyabr oyida Floridada sodir bo‘lgan suiqasd urinishlarini eslab o‘tdi hamda Amerika jamiyatini siyosiy keskinlikni kamaytirishga chaqirdi.

Siyosiy zo‘ravonlik ehtimoli haqidagi savolga javob berar ekan, prezident bu haqda doimiy ravishda xavotirlanib yashay olmasligini aytib, davlat rahbari ishi tabiatan xavf-xatarlar bilan bog‘liq ekanini taʼkidladi.

U o‘z vazifalarini bajarishga to‘liq eʼtibor qaratayotganini qayd etdi hamda amalga oshirilgan ishlar va mamlakat bilan faxrlanishini bildirdi.