Toshkent, O’zbekiston (UzDaily.uz) — O‘zbekiston terma jamoasi sportchilari Aichi-Nagoya 2026 V yozgi Osiyo parao‘yinlarida ko‘plab medallarni qo‘lga kiritdi.
Mamlakat vakillari parapauerlifting, paradzyudo, paratxekvondo, suzish, yengil atletika va shosse velosporti bo‘yicha musobaqalarda g‘olib va sovrindor bo‘lishdi. O‘zbekistonlik bir nechta sportchi rekordlarni ham yangiladi.
Parapauerlifting bo‘yicha 80 kilogrammgacha bo‘lgan vazn toifasida Bekzod Jamilov, 67 kilogrammgacha bo‘lgan vazn toifasida esa Ruxshona O‘ktamova oltin medallarni qo‘lga kiritdi. Jamilov 229 kilogramm og‘irlikni ko‘tardi.
Iroqlik kumush medal sohibi 222 kilogramm, xitoylik bronza medali sovrindori esa 215 kilogramm natija qayd etdi. O‘ktamova musobaqani 127 kilogramm natija bilan yakunladi.
Ruza Qo‘ziyeva 73 kilogrammgacha bo‘lgan vazn toifasida 152 kilogramm og‘irlikni ko‘tarib, jahon rekordini o‘rnatgan holda chempion bo‘ldi. Uning hamyurti Qudratoy Toshpo‘latova 130 kilogramm natija bilan bronza medalini qo‘lga kiritdi. Ikkinchi o‘rinni 146 kilogramm ko‘targan xitoylik sportchi egalladi.
Paradzyudo bo‘yicha Dovurxon Karomatov 95 kilogrammgacha bo‘lgan vazn toifasida J2 klassida oltin medalni qo‘lga kiritdi. U aylanma tizimda o‘tkazilgan musobaqada barcha raqiblari ustidan g‘alaba qozondi.
Mohinur Parmonova 70 kilogrammdan yuqori vazn toifasida kumush medal, Habiba Jo‘rayeva esa bronza medaliga sazovor bo‘ldi. Feruza Ergasheva shu vazn toifasida J1 klassida bronza medalini qo‘lga kiritdi. Islomjon To‘xtaboyev 95 kilogrammdan yuqori vaznda J1 klassi bo‘yicha kumush medal oldi.
Paratxekvondo bo‘yicha Guljonoy Naimova 65 kilogrammdan yuqori vazn toifasining finalida xitoylik raqibasini 2:0 hisobida mag‘lub etib, oltin medalni qo‘lga kiritdi. Karomat Qosimova ham shu vazn toifasida bronza medali uchun kechgan bahsda eronlik raqibasini 2:0 hisobida yengdi.
Otabek Amatov 80 kilogrammgacha bo‘lgan vazn toifasida qozog‘istonlik sportchini 2:0 hisobida mag‘lub etib, bronza medaliga sazovor bo‘ldi. Asadbek Toshtemirov ham 80 kilogrammdan yuqori vazn toifasida Janubiy Koreya vakilini 2:0 hisobida yengib, bronza medalini qo‘lga kiritdi. Umarjon Muydinov esa ushbu vazn toifasida eronlik sportchiga 0:2 hisobida mag‘lub bo‘lib, kumush medal bilan taqdirlandi.
Yengil atletika bo‘yicha Doston Qahhorov T36 klassida erkaklar o‘rtasida 400 metrga yugurishda 54,42 soniya natija bilan g‘olib chiqdi va Osiyo parao‘yinlari rekordini o‘rnatdi. Boburjon Omonov F41 klassida yadro uloqtirish bo‘yicha 13,07 metr natija bilan oltin medalni qo‘lga kiritib, musobaqa rekordini ham yangiladi.
Sabina Suxanova T37 klassida uzunlikka sakrashda 4,39 metr natija bilan kumush medal oldi. Shahina Azimova 4,12 metr natija bilan bronza medaliga sazovor bo‘ldi. Botir Muhammedov T13 klassida 6,24 metr natija bilan uchinchi o‘rinni egalladi. Temurbek G‘iyosov esa T64 klassida balandlikka sakrashda 1,86 metr natija ko‘rsatib, bronza medalini qo‘lga kiritdi.
Suzish bo‘yicha Muslima Odilova S13 klassida 100 metrga orqa usulda suzishda 1 daqiqa 12,99 soniya natija bilan oltin medalni qo‘lga kiritdi. Yegor Bolotov ham erkaklar o‘rtasida ushbu masofada 58,43 soniya natija ko‘rsatib, chempion bo‘ldi va Osiyo rekordini o‘rnatdi. Dias Mirmanov S9 klassida 400 metrga erkin usulda suzishda 4 daqiqa 32,18 soniya natija bilan bronza medaliga ega chiqdi.
Shosse velosporti bo‘yicha Jahongir Xalilov T1–2 klassida erkaklar o‘rtasidagi alohida startli poygada 20 daqiqa 56,10 soniya natija bilan uchinchi o‘rinni egalladi.
Ayollar o‘rtasida shu klassida o‘tkazilgan poygada Marjona Pardaboyeva 25 daqiqa 58,04 soniya natija bilan oltin medalni, Odina Hamdamova esa 31 daqiqa 36,76 soniya natija bilan kumush medalni qo‘lga kiritdi.
Robiyaxon Toshpo‘latova yo‘lboshlovchi Olga Zabelinskaya bilan bir juftlikda B klassidagi tandemlar o‘rtasida alohida startli poygada 32 daqiqa 45,82 soniya natija bilan kumush medalga sazovor bo‘ldi.
Bunyod Haitmahammadov C1–C5 klassida erkaklar o‘rtasidagi poygada 25 daqiqa 39,46 soniya natija bilan kumush medalni qo‘lga kiritdi.
