Toshkent, O’zbekiston (UzDaily.uz) — Farg‘ona viloyatida Xitoyning Jinan Fengmian Machinery Equipment Co., Ltd. kompaniyasi tomonidan taklif etilgan investitsiya loyihasi ko‘rib chiqildi. Kompaniya xom paxtani qayta ishlash va paxta yog‘i ishlab chiqarishga ixtisoslashgan sanoat majmuasini qurishni rejalashtirmoqda.
Loyiha viloyat hokimi Xayrullo Bozorovning kompaniya direktori Syuli Lyu bilan uchrashuvida muhokama qilindi. Bu haqda Farg‘ona viloyati hokimligi xabar berdi.
Muzokaralar yakunlariga ko‘ra, tomonlar loyiha takliflarini amaliy bosqichga o‘tkazish va ushbu yo‘nalishdagi hamkorlikni davom ettirishga kelishib oldi.
Jinan Fengmian Machinery Equipment Co., Ltd. kompaniyasi 2012 yilda Xitoyning Shandun viloyatidagi Szinan shahrida tashkil etilgan.
Kompaniya xom paxtani qayta ishlash uchun texnologik uskunalarni loyihalash, ishlab chiqarish va yetkazib berishga ixtisoslashgan.
Korxona o‘zining ishlab chiqarish quvvatlari va muhandislik-texnik salohiyatiga ega. Shuningdek, kompaniya xalqaro bozorlarga, jumladan, Markaziy Osiyo mamlakatlariga uskunalar yetkazib berish tajribasiga ega.
Farg‘ona viloyatida Xitoy investorlari bilan turli sohalarda qo‘shma loyihalar amalga oshirilmoqda. Hududiy hokimlik vakillari yangi hamkorlarning viloyatdagi mavjud investitsiya imkoniyatlariga qiziqishi ortib borayotganini taʼkidlamoqda.
