Toshkent, O’zbekiston (UzDaily.uz) — 2026 yilning birinchi yarmida O‘zbekistonda 373,4 mingta tug‘ilish qayd etildi. 2025 yilda bu ko‘rsatkich 879,6 mingtani tashkil etgan bo‘lsa, 1991 yildan buyongi davrda eng yuqori natija 2023 yilda kuzatilib, 962 mingtaga yetgan. Bu haqda Milliy statistika qo‘mitasi maʼlum qildi.
Taqdim etilgan maʼlumotlarga ko‘ra, 1991 yilda mamlakatda 723,4 mingta tug‘ilish qayd etilgan. 1995 yilga kelib bu ko‘rsatkich 678 mingtagacha kamaygan, 2000 yilda esa 527,6 mingtani tashkil etgan. Bu statistikada keltirilgan yillar orasidagi eng past ko‘rsatkich hisoblanadi.
Keyingi yillarda tug‘ilishlar soni ko‘payib borgan. 2005 yilda 533,5 mingta, 2010 yilda 634,8 mingta, 2015 yilda esa 734,1 mingta tug‘ilish qayd etilgan. 2020 yilda ushbu ko‘rsatkich 841,8 mingtaga yetgan.
2021 yilda O‘zbekistonda 905,2 mingta, 2022 yilda 932,2 mingta tug‘ilish qayd etilgan. 2023 yilda tug‘ilishlar soni 962 mingtaga yetib, eng yuqori ko‘rsatkichni tashkil qilgan. Shundan so‘ng pasayish kuzatilgan: 2024 yilda tug‘ilishlar soni 926,4 mingta, 2025 yilda esa 879,6 mingta bo‘lgan.
Shunday qilib, keltirilgan maʼlumotlar 1990-yillarda tug‘ilishlar soni kamayganini, keyingi yillarda o‘sish kuzatilganini va 2023 yildagi eng yuqori ko‘rsatkichdan so‘ng pasayish boshlanganini ko‘rsatadi.
