Toshkent, O’zbekiston (UzDaily.uz) — Yaponiya Immigratsiya xizmatlari agentligi yaqin kunlarda Yaponiyada noqonuniy ravishda bo‘lib turgan ikki nafar O‘zbekiston fuqarosini O‘zbekistonga deportatsiya qildi.
Bu haqda Yaponiyaning O‘zbekistondagi elchixonasi 2026 yil 6 oktyabrda tarqatgan press-relizda maʼlum qilindi. Press-reliz sarlavhasida deportatsiya davlat byudjeti mablag‘lari hisobidan amalga oshirilgani qayd etilgan.
Elchixona maʼlumotiga ko‘ra, har ikki fuqaro Yaponiyaga talabalar vizasi bilan kirgan, uning amal qilish muddati tugaganidan so‘ng mamlakatda qolgan va keyinchalik hokimiyat organlari tomonidan qo‘lga olingan.
Elchixona talabalar vizasi taʼlim olish uchun berilishini va u pul ishlash huquqini bermasligini eslatdi.
Noqonuniy qolish yoki noqonuniy mehnat faoliyati bilan shug‘ullanish holati aniqlangan shaxslarga nisbatan qatʼiy choralar qo‘llanadi: politsiya tomonidan ushlash va hibsga olish, immigratsiya markaziga joylashtirish hamda deportatsiya.
Yaponiya hukumati qoidabuzarlar haqidagi maʼlumotlarni O‘zbekiston hukumatiga taqdim etadi. Shu sababli ularga nisbatan choralar vatanga qaytganidan keyin ham qo‘llanilishi mumkin, deyiladi xabarda. Elchixona fuqarolarni nihoyatda ehtiyotkor bo‘lishga va «Yaponiyada ishlash mumkin» kabi takliflarga ishonmaslikka chaqirdi.
Elchixona, shuningdek, keng tarqalgan noto‘g‘ri tushunchaga eʼtibor qaratdi: go‘yoki qochqin maqomini olish uchun ariza berish mamlakatda «uzoq vaqt qolish» yoki “ishlash” imkonini beradi. Bunday maqsadda ariza berishga yo‘l qo‘yilmaydi.
Agar qochqin maqomi berish rad etilsa, shaxs immigratsiya markaziga joylashtirilishi yoki deportatsiya qilinishi mumkin.
Elchixona ogohlantirishicha, ariza berish jarayonida yolg‘on maʼlumotlar taqdim etish yoki firibgarlik usullaridan foydalanish jiddiy huquqiy oqibatlarga olib kelishi mumkin.
