Toshkent, O’zbekiston (UzDaily.uz) — O‘zbekiston va Rossiya hududlar o‘rtasidagi to‘g‘ridan-to‘g‘ri hamkorlikni, sanoat kooperatsiyasini, savdo va investitsiyaviy hamkorlikni kengaytirish niyatida. Bu masalalar 6 oktyabr kuni Farg‘onada ikki davlat Hududlar kengashining III yalpi majlisida muhokama qilindi.
Majlis O‘zbekiston va Rossiya prezidentlari Shavkat Mirziyoyev va Vladimir Putinning tabrik yo‘llovlarini o‘qib eshittirishdan boshlandi. O‘zbekiston rahbarining murojaatini O‘zbekiston Bosh vaziri o‘rinbosari Jamshid Xodjayev, Rossiya tomonining murojaatini esa Rossiya Hukumati raisi birinchi o‘rinbosari Denis Manturov o‘qib eshittirdi.
Xodjayevning taʼkidlashicha, Hududlar kengashining Farg‘onada o‘tkazilishi hududlararo aloqalarni rivojlantirish uchun alohida ahamiyatga ega. Uning so‘zlariga ko‘ra, sakkiz yil davomida ikki mamlakat hududlari hamkorligi mexanizmi amaliy samaradorligini namoyon etdi.
Joriy majlisda Rossiyaning 17 ta hududi rahbarlari va vakillari, O‘zbekistonning barcha hududlari vakillari, shuningdek, ikki mamlakatdan qariyb 400 nafar tadbirkor ishtirok etdi.
Xodjayevning so‘zlariga ko‘ra, O‘zbekistonning barcha 14 ta hududi Rossiya Federatsiyasining 50 dan ortiq subyekti bilan barqaror aloqalarni yo‘lga qo‘ygan. Kooperatsiya loyihalarining qo‘shma portfeli umumiy qiymati qariyb 6 milliard dollarni tashkil etuvchi 200 dan ortiq tashabbusdan iborat.
«Bularning barchasi hududlar strategik vazifalarni amalga oshirishdagi hamkorligimizning mustahkam asoslaridan biri ekanini tasdiqlaydi», — deya taʼkidladi u.
Manturovning maʼlum qilishicha, 2026 yil boshidan buyon Rossiya hududlari va ularning o‘zbekistonlik hamkorlari ikki mamlakatdagi eng yirik ishbilarmonlik maydonlarida o‘tkazilgan tadbirlarni ham inobatga olgan holda, qariyb 100 ta qo‘shma tadbir tashkil etgan.
U, shuningdek, ishtirokchilarni IV Hududlar kengashini o‘tkazish rejalashtirilayotgan Omskka taklif qildi.
Yalpi muhokamada O‘zbekistonning Farg‘ona, Surxondaryo va Namangan viloyatlari, shuningdek, Rossiyaning Krasnoyarsk va Oltoy o‘lkalari, Novosibirsk va Omsk viloyatlari rahbarlari hamda vakillari so‘zga chiqdi.
Majlisning amaliy natijalaridan biri to‘rtta hujjat — uchta hududlararo kelishuv va bitta tijoriy kelishuvning almashilishi bo‘ldi.
Farg‘ona viloyati va Omsk viloyati sanoat sohasida hamkorlik to‘g‘risida kelishuv tuzdi. Surxondaryo viloyati va Krasnoyarsk o‘lkasi savdo-iqtisodiy, ilmiy-texnik, madaniy va gumanitar sohalarda hamkorlik qilishga kelishib oldi.
Namangan viloyati va Dog‘iston Respublikasi savdo-iqtisodiy, ilmiy-texnik va ijtimoiy-madaniy hamkorlik to‘g‘risidagi kelishuvni amalga oshirish bo‘yicha tadbirlar rejasini kelishib oldi.
Investitsiya sohasida ham alohida hujjat imzolandi. O‘zbekiston Investitsiyalar, sanoat va savdo vazirligi hamda Wildberries “A” toifali logistika majmuasini qurishni nazarda tutuvchi investitsiyaviy kelishuv tuzdi.
Hududlar kengashi O‘zbekiston va Rossiya o‘rtasida iqtisodiy hamkorlikni rivojlantirish mexanizmlaridan biri sifatida qaralmoqda.
Mintaqalar o‘rtasidagi to‘g‘ridan-to‘g‘ri aloqalar tomonlarga yangi biznes aloqalarini rivojlantirish va mintaqalararo kelishuvlardan aniq investitsiya va sanoat loyihalarini amalga oshirishga o‘tish imkonini beradi.
