Toshkent, O’zbekiston (UzDaily.uz) — ICT WEEK Uzbekistan 2026 doirasida IT Park Uzbekistan ishtirokchilar bilan hamkorlik bo‘yicha direktori Lazizbek Xudyayev ICT BULUT BILISIM rahbariyati bilan uchrashdi.
Tomonlar kompaniyaning O‘zbekistondagi biznesini rivojlantirish, bulutli infratuzilma va infratuzilma loyihalarini amalga oshirish masalalarini muhokama qildi. Bu haqda IT Park Uzbekistan xabar berdi.
Uchrashuvda ICT BULUT BILISIM kompaniyasi nomidan direktor Erdeniz Ilhan Murtazalar, sotuvlar va biznesni rivojlantirish direktori Nazokat Tolipova, yechimlar arxitektori Sanjar Dusmuhamedov hamda Markaziy Osiyo bo‘yicha direktori Kamber Ozdemir ishtirok etdi.
Kompaniya bulutli yechimlar va IT-infratuzilma sohasidagi xizmatlarga ixtisoslashgan. ICT BULUT BILISIM vakillari amalga oshirilayotgan loyihalar haqida maʼlumot berib, Markaziy Osiyoda biznesni yana-da rivojlantirishning asosiy yo‘nalishlarini belgilab oldi.
Asosiy mavzulardan biri kompaniyaning O‘zbekistonda yangi data-markazlar qurilishiga investitsiya kiritish rejalari bo‘ldi. Loyiha mamlakat oliy taʼlim muassasalarini raqamlashtirish doirasida ko‘rib chiqilmoqda va O‘zbekiston Respublikasi Oliy taʼlim, fan va innovatsiyalar vazirligi bilan hamkorlikda amalga oshirilishi rejalashtirilgan.
Uchrashuv ishtirokchilari, shuningdek, bulutli infratuzilmani rivojlantirish va taʼlim sohasida zamonaviy IT-yechimlardan foydalanish ko‘lamini kengaytirish istiqbollarini muhokama qildi.
ICT BULUT BILISIMning O‘zbekiston bozoridagi ishtirokini yana-da mustahkamlash va raqamli infratuzilma sohasida hamkorlikni kengaytirish imkoniyatlariga alohida eʼtibor qaratildi.
