Toshkent, O’zbekiston (UzDaily.uz) — 2026 yil 17–24 oktyabr kunlari Namangan viloyatida «Dunyoda rus tili elchilari» xalqaro volontyorlik dasturi doirasida taʼlimiy-maʼrifiy ekspeditsiya bo‘lib o‘tadi.
O‘n nafar volontyor maktab o‘quvchilari va talabalar uchun rus tili, adabiyoti hamda Rossiya madaniyatiga bag‘ishlangan interaktiv mashg‘ulotlar, ijodiy topshiriqlar va mahorat darslarini tashkil etadi. Bu haqda A.S. Pushkin nomidagi Davlat rus tili instituti maʼlum qildi.
Ekspeditsiyaga Pushkin institutining metodisti va tashkilotchisi rahbarlik qiladi. Unda rus tili elchisi maqomiga ega bo‘lgan tajribali ishtirokchilar bilan bir qatorda xorijiy auditoriyada ilk bor mashg‘ulot o‘tkazadigan volontyorlar ham qatnashadi.
Ular uchun ushbu safar «Rus tili elchisi» farqlovchi belgisini olish yo‘lidagi muhim bosqich bo‘ladi.
Mashg‘ulotlar viloyatdagi bir nechta taʼlim muassasasida o‘tkaziladi. Isʼhoqxon Ibrat nomidagi Namangan davlat chet tillari institutida volontyorlar rus tili va adabiyotini o‘rganayotgan talabalar, shuningdek, kelajakda rus tili o‘qituvchisi bo‘ladigan yoshlar bilan uchrashadi.
Mahorat darslari va uchrashuvlar Biznes va huquq universiteti, Namangan davlat universiteti, “Turan” xalqaro universiteti hamda “IZB” xususiy maktabida ham o‘tkazilishi rejalashtirilgan.
«O‘zbekiston “Dunyoda rus tili elchilari” dasturi faoliyatining muhim yo‘nalishlaridan biri hisoblanadi. Ishonchim komilki, Namangan viloyati maktablari va universitetlarida o‘tkaziladigan mashg‘ulotlar yoshlarning rus tiliga bo‘lgan qiziqishini mustahkamlashga yordam beradi hamda mamlakatlarimiz o‘rtasidagi taʼlim sohasidagi hamkorlikni rivojlantirish yo‘lidagi yana bir qadam bo‘ladi», — dedi Pushkin instituti rektori Nikita Gusev.
Dastur ishtirokchisi Polina Dyudina uchun bu ekspeditsiya ilk safar bo‘ladi. «Bu mening birinchi ekspeditsiyam va xorijga birinchi safarim. Rus tili bo‘yicha mashg‘ulotlar o‘tkazishdan hamda bolalarni Rossiya taʼlim tizimi va uning imkoniyatlari bilan tanishtirishdan mamnun bo‘laman», — dedi u.
«Dunyoda rus tili elchilari» dasturi Pushkin instituti tomonidan 2015 yildan buyon Rossiya Fan va oliy taʼlim vazirligi, Tashqi ishlar vazirligi hamda Rossotrudnichestvo ko‘magida amalga oshirib kelinmoqda.
