Toshkent, O’zbekiston (UzDaily.uz) — O‘zbekiston Prezidenti Shavkat Mirziyoyev Markaziy Osiyoning muhim minerallari bo‘yicha mintaqaviy alyansni yaratishni jadallashtirish va uning amaliy faoliyatini Markaziy Osiyodagi kritik minerallar zaxiralarining Yagona raqamli xaritasini ishlab chiqishdan boshlashni taklif qildi. Davlat rahbari bu tashabbusni Turkmanistonning Avaza shahrida bo‘lib o‘tgan Markaziy Osiyo davlatlari va Ozarbayjon rahbarlarining sakkizinchi Maslahat uchrashuvida ilgari surdi. Bu haqda O‘zbekiston Respublikasi Prezidenti matbuot xizmati xabar berdi.
Muhim minerallar bo‘yicha mintaqaviy alyansni tashkil etish tashabbusi avvalroq O‘zbekiston tomonidan ilgari surilgan edi. Sammitda so‘zga chiqqan Mirziyoyev kritik minerallarning ahamiyati jadal oshib borayotganini qayd etib, mintaqa mamlakatlarining bu sohada birgalikda harakat qilishi zarurligini taʼkidladi.
Prezidentning so‘zlariga ko‘ra, zaxiralarning yagona raqamli xaritasi alyans doirasidagi ishlarning dastlabki amaliy qadamlaridan biri bo‘lishi mumkin. Bunday resurs Markaziy Osiyoning salohiyati haqida yana-da to‘liq tasavvur shakllantirish va xalqaro investorlarga mintaqa mamlakatlarining kritik minerallar yo‘nalishini birgalikda rivojlantirishga tayyorligini namoyish etish imkonini beradi.
«Bu yerda bizga birgalikda harakat qilish muhim», — dedi Mirziyoyev.
Muhim minerallar bo‘yicha tashabbus O‘zbekiston Prezidentining mintaqaviy hamkorlikni chuqurlashtirishga qaratilgan keng takliflar paketiga kirdi. Ular orasida qo‘shma sanoat va texnologik zanjirlarni yaratish, qo‘shma investitsiya loyihalarini moliyaviy-texnik qo‘llab-quvvatlash platformasini tashkil etish hamda Infratuzilmani rivojlantirish kengashini tuzishni jadallashtirish takliflari bor.
Mirziyoyev, shuningdek, bir nechta mamlakat korxonalarining yagona ishlab chiqarish zanjirida ishtirok etishini nazarda tutuvchi «oltita iqtisodiyot — bitta mahsulot» formulasini amaliy mazmun bilan to‘ldirishni taklif qildi.
Markaziy Osiyo davlatlari va Ozarbayjon rahbarlarining sakkizinchi Maslahat uchrashuvi ilk bor Ozarbayjon ishtirokida o‘tkazildi. Uchrashuv yakunlariga ko‘ra, bir yil davomida Turkmaniston amalga oshirgan formatga raislik Ozarbayjonga o‘tadi.
