Toshkent, O’zbekiston (UzDaily.uz) — O‘zbekiston futbol terma jamoasi 12 noyabr kuni Toshkentda Rossiya terma jamoasiga qarshi o‘rtoqlik uchrashuvini o‘tkazadi. Bu haqda O‘zbekiston futbol assotsiatsiyasi matbuot xizmati xabar berdi.
Uchrashuv FIFAning noyabr oyidagi xalqaro o‘yinlar oynasi doirasida “Paxtakor” stadionida bo‘lib o‘tadi.
O‘zbekiston milliy terma jamoasiga italiyalik mutaxassis Fabio Kannavaro bosh murabbiylik qilmoqda.
Bo‘lajak uchrashuv O‘zbekiston va Rossiya terma jamoalari o‘rtasidagi ikkinchi bahs bo‘ladi. Jamoalar avval 2022 yil noyabr oyida Toshkentda uchrashgan va o‘yin 0:0 hisobida durang bilan yakunlangan.
Xalqaro futbol federatsiyasining (FIFA) amaldagi reytingida O‘zbekiston terma jamoasi 59-o‘rinni, Rossiya terma jamoasi esa 35-o‘rinni egallab turibdi.
