Toshkent, O’zbekiston (UzDaily.uz) — 2026 yil 1 oktyabrdan O‘zbekistonda hududlarni obodonlashtirish va sanitariya jihatdan tozalash bo‘yicha 2 oyligi boshlanadi.
Tegishli chora-tadbirlar Prezidentning «“Yashil makon” umummilliy loyihasini amalga oshirishda mahallalar rolini kuchaytirish va hududlarning yashillik darajasini tubdan oshirishga doir chora-tadbirlar to‘g‘risida»gi farmonida nazarda tutilgan.
1 oktyabrdan yashil hududlarni joylashtirish uchun joylar belgilanadi, yer maydonlari tayyorlanadi, shuningdek, ko‘chat va butalar zaxirasi yaratiladi.
Ko‘chat ekish mavsumi Qoraqalpog‘iston va Xorazm viloyatida 1 noyabrdan, Buxoro va Navoiy viloyatlarida 5 noyabrdan boshlanadi.
Andijon, Jizzax, Samarqand, Sirdaryo, Namangan, Toshkent va Farg‘ona viloyatlarida, shuningdek, Toshkent shahrida ko‘chat ekish 10 noyabrdan boshlanadi. Surxondaryo va Qashqadaryo viloyatlarida mavsum 20 noyabrdan boshlanadi.
2027 yil 1 yanvardan «Yashil mahalla» loyihasi doirasida «Mahallani ko‘kalamzorlashtirish» paketi joriy etiladi. O‘rmon xo‘jaligi agentligi tomonidan mahallalarga o‘rmonchi-murabbiylar biriktiriladi. «Mahalla yettiligi» aʼzolari har bir ko‘chat ekish mavsumi boshlanishidan oldin qisqa muddatli o‘quv kurslaridan o‘tadi.
2026 yil kuzgi mavsumida mahallalarda kichik yer maydonlarida, ko‘p qavatli uylar orasida, shuningdek, maktab va bolalar bog‘chalari hovlilarida mikroo‘rmonlar barpo etish boshlanadi.
Ishlarni Qoraqalpog‘iston Respublikasi Vazirlar Kengashi, viloyatlar va Toshkent shahri hokimliklari O‘zbekiston mahallalari uyushmasi, O‘rmon xo‘jaligi agentligi hamda Qurilish va uy-joy kommunal xo‘jaligi vazirligi bilan hamkorlikda tashkil etadi.
200 dan 1 000 kvadrat metrgacha bo‘lgan maydonlarda zich yarusli ekish usuli qo‘llaniladi — har bir kvadrat metrga kamida ikkitadan daraxt va buta ko‘chati ekiladi.
Yer maydoni ajratish imkoni bo‘lmagan yoki beton va asfalt qoplamalari mavjud hududlarda kichik jamoat bog‘lari tashkil etiladi.
Hokimliklar va homiylar o‘simliklarni yetishtirish uchun yirik hajmli idishlarni o‘rnatadi, O‘rmon xo‘jaligi agentligi sifatli ko‘chatlar yetkazib berishni taʼminlaydi, mahallalar esa ko‘ngillilar ishtirokida ko‘chat ekish va o‘simliklarni parvarishlash ishlarini tashkil etadi.
Bundan tashqari, 2027 yil 1 yanvardan «Yashil lot» tizimi joriy etiladi. U Ekologiya qo‘mitasi, Qoraqalpog‘iston Respublikasi Vazirlar Kengashi, viloyatlar va Toshkent shahri hokimliklariga jismoniy va yuridik shaxslarga shartnoma asosida yashil bog‘lar barpo etish uchun yer maydonlarini nom berish sharti bilan taqdim etish imkonini beradi.
Taqdim etilgan hududlardan faqat belgilangan maqsadlarda foydalanish mumkin bo‘ladi.
Ularni mulk qilib berish, qurilish ishlarini amalga oshirish, inshootlar o‘rnatish yoki boshqa faoliyat turlari uchun foydalanish taqiqlanadi. Shu bilan birga, aholining umumiy foydalanishdagi hududlarga kirishi cheklanmaydi.
