Toshkent, O’zbekiston (UzDaily.uz) — Toshkentda birinchi bosqichda yiliga 20 million nafargacha yo‘lovchiga xizmat ko‘rsatishi mumkin bo‘lgan yangi xalqaro aeroport uchun qurilish maydonini tayyorlash ishlari boshlandi. Loyiha O‘zbekistonda transport-logistika infratuzilmasini 2030 yilgacha rivojlantirish dasturi doirasida amalga oshirilmoqda.
Avvalroq prezident Shavkat Mirziyoyev transport va logistika sohasidagi yirik loyihalarni amalga oshirish bo‘yicha taqdimot bilan tanishgan edi.
Hokimiyat vakillari iqtisodiy o‘sish, sanoat ishlab chiqarishining ortishi va tashqi savdoning kengayishi fonida transport infratuzilmasini izchil rivojlantirish zarurligini taʼkidlamoqda. O‘zbekistonni Tinch okeani va Yevropa o‘rtasidagi asosiy quruqlikdagi transport xabiga aylantirish ustuvor vazifalardan biri sifatida belgilangan.
2030 yilga qadar transport bozori hajmini ikki barobar oshirish, sohaga 9,1 milliard dollar investitsiya jalb qilish va logistika xizmatlari eksportini 5,7 milliard dollarga yetkazish rejalashtirilmoqda.
Aviatsiya infratuzilmasini rivojlantirish doirasida Toshkent va Buxoroda umumiy qiymati qariyb 3 milliard dollar bo‘lgan yangi aeroport majmualari barpo etilmoqda.
Toshkentda yangi xalqaro aeroport loyihasi bo‘yicha davlat-xususiy sheriklik to‘g‘risidagi bitimlar allaqachon imzolangan. Ayni vaqtda qurilish maydonini tayyorlash va muhandislik tarmoqlarini ko‘chirish ishlari olib borilmoqda.
Buxoroda yangi aeroportning aerodrom infratuzilmasi yaratilmoqda. Shu bilan birga, yo‘lovchi terminalini qurish va boshqarish uchun xususiy sherikni jalb etish maqsadida xalqaro tender o‘tkazilmoqda.
Shuningdek, Urganch va Namangan aeroportlarini davlat-xususiy sheriklik shartlari asosida modernizatsiya qilish masalasi ko‘rib chiqilmoqda. Andijonda esa xususiy operatorni jalb qilish rejalashtirilgan.
Ushbu loyihalarning amalga oshirilishi aeroportlarning o‘tkazish quvvatini oshirishi va xalqaro standartlarga muvofiq yo‘lovchilarga xizmat ko‘rsatish imkoniyatlarini kengaytirishi kutilmoqda.
Avtomobil yo‘llarini rivojlantirish masalasiga ham alohida eʼtibor qaratildi. Iyul oyida qiymati 2,2 milliard dollar bo‘lgan Toshkent — Samarqand pullik avtomobil yo‘lini qurish boshlangan. Avgust oyida mamlakatdagi birinchi pullik Urganch — Xiva avtomobil yo‘li foydalanishga topshirildi.
Ishtirokchilar Toshkent — Samarqand trassasidagi keyingi ishlarni moliyalashtirish, shuningdek, Toshkent — Bo‘stonliq va Toshkent — Andijon pullik avtomobil yo‘llarini qurish uchun investorlarni aniqlash masalalarini ham muhokama qildi.
