Toshkent, O’zbekiston (UzDaily.uz) — Toshkentda 21 sentyabr kuni poytaxt Bosh soliq boshqarmasining sobiq boshlig‘i Yunusjon Nasimjonov va Bosh prokuratura huzuridagi Iqtisodiy jinoyatlarga qarshi kurashish departamenti shahar boshqarmasi sobiq boshlig‘ining o‘rinbosari Alisher G‘aniyevga nisbatan jinoyat ishi bo‘yicha sud muhokamasi boshlandi.
Oliy sudning axborot tizimi maʼlumotlariga ko‘ra, Nasimjonov Jinoyat kodeksining 167-moddasi 3-qismi “a” bandi — o‘ta ko‘p miqdorda o‘zlashtirish yoki rastrata yo‘li bilan talon-toroj qilish, shuningdek, 205-moddasi 2-qismi “a” bandi — o‘ta ko‘p miqdorda zarar yetkazgan holda hokimiyat yoki mansab vakolatlarini suiisteʼmol qilishda gumon qilinmoqda.
167-modda bo‘yicha 300 baravardan 600 baravargacha bazaviy hisoblash miqdorida jarima, uch yilgacha axloq tuzatish ishlari yoki besh yildan o‘n yilgacha ozodlikdan mahrum qilish jazosi nazarda tutilgan. Nasimjonov 2021 yildan buyon Toshkent shahar Bosh soliq boshqarmasiga rahbarlik qilib kelgan.
Sud maʼlumotlariga ko‘ra, G‘aniyev Jinoyat kodeksining 205-moddasi 2-qismi “a” bandi, shuningdek, 223-moddasi 2-qismi “v” va “g” bandlarida nazarda tutilgan jinoyatlarni sodir etganlikda gumon qilinmoqda. Mazkur modda xorijga noqonuniy chiqish, jumladan, takroran sodir etilgan holatlar, shuningdek, xorijga chiqishi maxsus kelishuvni talab qiladigan mansabdor shaxs tomonidan sodir etilgan harakatlar uchun javobgarlikni nazarda tutadi.
Har ikki mansabdor shaxs 27 yanvar kuni bo‘lib o‘tgan yig‘ilishdan so‘ng lavozimidan ozod qilingan. O‘shanda prezident Shavkat Mirziyoyev poytaxtda soliq organlari va yashirin iqtisodiyotga qarshi kurashish tuzilmalari faoliyatini mutlaqo qoniqarsiz deb baholagan. Shu bilan birga, barcha tuman soliq inspeksiyalari rahbarlari ham lavozimidan ozod qilinib, ularning o‘rniga vazifasini bajaruvchilar tayinlangan.
Davlat rahbari, shuningdek, ayrim soliq organlari rahbarlari soliq tushumlarini ko‘paytirish o‘rniga ayrim «qo‘shtirnoq ichidagi tadbirkorlar»ga homiylik qilish bilan shug‘ullanayotganini aytgan. O‘tkazilgan tekshiruvlar natijasida poytaxtda 70 milliard so‘mlik hisobga olinmagan soliqlar aniqlangan.
