Toshkent, O’zbekiston (UzDaily.uz) — Janubiy Koreyaga amaliy tashrif doirasida Tibbiy va farmatsevtika sohasini rivojlantirish agentligi direktori Abdulla Azizov og‘iz orqali qabul qilinadigan farmatsevtika mahsulotlarini ishlab chiqaruvchi yetakchi koreys kompaniyalaridan birining rahbariyati bilan uchrashdi. Bu haqda Tibbiy va farmatsevtika sohasini rivojlantirish agentligi xabar berdi.
Tomonlar O‘zbekiston farmatsevtika sanoatini rivojlantirish, zamonaviy ishlab chiqarish texnologiyalarini joriy etish va ilg‘or koreys tajribasini mamlakat farmatsevtika sohasida qo‘llash masalalarini muhokama qildi.
Farmatsevtika mahsulotlarini mahalliylashtirish, qo‘shma investitsiya loyihalarini amalga oshirish, ishlab chiqarish quvvatlarini yaratish hamda mahsulotlarni mintaqaviy bozorlarga eksport qilish imkoniyatlariga alohida eʼtibor qaratildi.
Abdulla Azizov kompaniya vakillariga O‘zbekistonda xorijiy investorlar uchun yaratilgan qulay sharoitlar, «BioPharma City» farmatsevtika klasteri loyihasi, shuningdek, ishlab chiqarish loyihalarini «noldan tayyor mahsulotgacha» tamoyili asosida amalga oshirish imkoniyatlari haqida maʼlumot berdi.
