O‘zbekistonda xususiylashtirish jarayoni jadallashmoqda

Toshkent, O’zbekiston (UzDaily.uz) — O‘zbekistonda xususiy biznes va investorlar uchun imkoniyatlar xususiylashtirishning yangi bosqichi doirasida kengaytirilmoqda.

O‘zbekiston Respublikasi Prezidentining 2026 yil 28 avgustdagi PF-177-son farmoniga muvofiq, 84 ta xo‘jalik jamiyatidagi davlat ulushlari, 1242 ta ko‘chmas mulk obyekti va qariyb 8 ming gektar yer maydonini savdoga chiqarish rejalashtirilmoqda. Bu haqda Davlat aktivlarini boshqarish agentligi xabar berdi.

Bundan tashqari, davlat ishtirokidagi 85 ta korxonani tugatish va qayta tashkil etish, shuningdek, avval sotilmagan 84 ta obyektni boshlang‘ich narxi 1 mln so‘mdan auksionga qayta chiqarish ko‘zda tutilgan.

Sotuvga chiqarilishi rejalashtirilayotgan aktivlarning umumiy qiymati 100 trln so‘mga baholanmoqda. Yil oxiriga qadar ularni sotishdan kamida 14 trln so‘m tushum olish kutilmoqda.

Xaridorlar uchun shartlar yengillashtiriladi

Yangi mexanizm davlat aktivlarini xarid qilishda avans to‘lovini 35 foizdan 15 foizgacha kamaytirishni nazarda tutadi.

Qolgan summani foiz hisoblanmagan holda bosqichma-bosqich to‘lash mumkin bo‘ladi.

Yirik bitimlar uchun qo‘shimcha imtiyozlar ham belgilangan. Aktiv qiymati olti oy ichida to‘liq to‘langan taqdirda, xaridor 25 foizlik chegirmaga ega bo‘lishi mumkin.

Shuningdek, aktiv qiymatining dastlabki 35 foizi to‘langanida 5 yilgacha, 50 foizi to‘langanida esa 7 yilgacha foizsiz bo‘lib-bo‘lib to‘lash imkoniyati nazarda tutilgan.

Agar aktivni uch oy ichida sotishning imkoni bo‘lmasa, uning narxi bosqichma-bosqich pasaytiriladi. Ayrim holatlarda «gibrid auksion» mexanizmi qo‘llanishi rejalashtirilgan. Unda savdolar davomida dastlab narx pasaytiriladi, so‘ng oshiriladi.

Mazkur mexanizmlar davlat tijorat banklari balansida turgan aktivlarga ham tatbiq etiladi.

Yer maydonlari «tayyor paket» sifatida sotiladi

Yer maydonlarining jozibadorligini oshirish maqsadida «tayyor paket» tamoyilini joriy etish rejalashtirilmoqda. Bu yer maydonlari muhandislik tarmoqlariga ulanish uchun oldindan tayyorlangan texnik shartlar va zarur ruxsat beruvchi hujjatlar bilan birga sotuvga chiqarilishini anglatadi.

Bundan tashqari, yirik davlat oliy taʼlim muassasalari va ixtisoslashtirilgan tibbiyot markazlarini bosqichma-bosqich tijoratlashtirish, xususiy kapital va zamonaviy moliyaviy vositalarni jalb qilish imkoniyati ham nazarda tutilgan.

Agentlikda taʼkidlanishicha, yangi chora-tadbirlarni amalga oshirish davlatning iqtisodiyotning raqobatli sektorlaridagi ishtirokini qisqartirish, xususiy tadbirkorlik imkoniyatlarini kengaytirish, investitsiyalarni jalb qilish va davlat aktivlaridan foydalanish samaradorligini oshirish imkonini beradi.