O‘zbekiston va Serbiya biznes hamkorligining yangi yo‘nalishlarini muhokama qildi
Toshkent, O’zbekiston (UzDaily.uz) — O‘zbekiston va Serbiya vakillari savdo-investitsiyaviy hamkorlikni kengaytirish hamda ikki mamlakat kompaniyalari o‘rtasida to‘g‘ridan-to‘g‘ri aloqalarni rivojlantirish masalalarini muhokama qildi. Muzokaralar O‘zbekiston Prezidentining Serbiyaga tashrifi arafasida bo‘lib o‘tdi. Bu haqda O‘zbekiston Savdo-sanoat palatasi xabar berdi.
O‘zbekiston Savdo-sanoat palatasi raisi maslahatchisi Jamil Maksudi Serbiyaning ishbilarmonlik tuzilmalari va kompaniyalari vakillari bilan qator uchrashuvlar o‘tkazdi. Ularning asosiylaridan biri Serbiya Savdo-sanoat palatasi vitse-prezidenti Mixail Vesovich hamda palataning xalqaro hamkorlik departamenti rahbari bilan bo‘lib o‘tdi.
Uchrashuv ishtirokchilari «O‘zbekiston — Serbiya» Biznes kengashi faoliyatini jadallashtirish va ikki mamlakat tadbirkorlari o‘rtasidagi bevosita hamkorlikni kengaytirish imkoniyatlarini ko‘rib chiqdi. Qo‘shma investitsiya loyihalarini tayyorlash va amalga oshirish masalalariga alohida eʼtibor qaratildi.
Hamkorlikning istiqbolli yo‘nalishlaridan biri sifatida qishloq xo‘jaligi, jumladan, go‘sht ishlab chiqarish sohasidagi loyihalar qayd etildi. Bundan tashqari, tomonlar savdo shartlari va tarif tartibga solish, shuningdek, GSP+ imtiyozlaridan yana-da samarali foydalanish imkoniyatlarini muhokama qildi.
Investitsiyaviy hamkorlik istiqbollari axborot-kommunikatsiya texnologiyalari va yengil sanoat sohalarida ham ko‘rib chiqildi.
Tashrif doirasida agrosanoat majmuasi va iqtisodiyotning boshqa tarmoqlarida faoliyat yuritayotgan Serbiya kompaniyalari vakillari bilan muzokaralar o‘tkazildi. Suhbatdoshlar savdo-investitsiyaviy aloqalarni kengaytirish, ilmiy-texnik tajriba almashish va mumkin bo‘lgan qo‘shma loyihalarni muhokama qildi. Bunda O‘zbekistondagi qishloq xo‘jaligi klasterlariga yo‘naltirilgan loyihalarga ham eʼtibor qaratildi.
Uchrashuvlarni tashkil etishda O‘zbekiston Savdo-sanoat palatasining Serbiyadagi vakili Viktor Ribich ishtirok etdi.
Tomonlar ishbilarmonlik aloqalarini yana-da rivojlantirish va qo‘shma loyihalar sonini ko‘paytirishdan manfaatdor ekanini bildirdi. Muzokaralarning davom ettirilishi ikki mamlakat o‘rtasida o‘zaro savdo va investitsiyaviy hamkorlikni kengaytirish uchun qo‘shimcha imkoniyatlar yaratishi kutilmoqda.
