Toshkentda Ruminiya elchisi yarim marafonda ishtirok etdi
Toshkent, O’zbekiston (UzDaily.uz) — O‘zbekistondagi Ruminiya elchisi Daniel Kristian Chobanu 6 sentyabr kuni Toshkent xalqaro yarim marafonida ishtirok etib, 5 kilometrlik masofada yugurdi.
Tadbir davomida diplomat O‘zbekiston xalqini mamlakat mustaqilligining 35 yilligi bilan tabriklab, musobaqaning yuqori darajada tashkil etilganini taʼkidladi.
Chobanu O‘zbekistonga tinchlik, farovonlik va muvaffaqiyatlar tiladi. Uning so‘zlariga ko‘ra, xalqaro yarim marafonning o‘tkazilishi mamlakatlar o‘rtasidagi sport aloqalarini rivojlantirish va ushbu sohada xalqaro hamkorlikni mustahkamlashga xizmat qiladi.
Diplomat shuningdek, Toshkent ko‘chalari va shahar diqqatga sazovor maskanlari yaqinidan o‘tgan yugurish marshrutiga alohida to‘xtaldi. U musobaqaning tashkil etilishini yuqori baholab, sport tadbiri davomida poytaxtni ko‘rish imkoniyatidan mamnunligini bildirdi.
O‘zbekiston va Ruminiyaning sport sohasidagi hamkorligi haqida gapirar ekan, elchi 2026 yilda o‘tkazilgan qator tadbirlarni qayd etdi. Jumladan, may oyida O‘zbekiston Milliy olimpiya qo‘mitasi bosh kotibi Oybek Qosimov Buxarest shahrida bo‘ldi.
Chobanu, shuningdek, o‘zbek grossmeysteri Javohir Sindarovning Super Chess Classic Romania 2026 turniridagi ishtirokini tilga oldi. Musobaqa 14–24 may kunlari Buxarestda bo‘lib o‘tdi va uning yakuniga ko‘ra Sindarov uchinchi o‘rinni egalladi.
Diplomat sport sohasidagi aloqalarga yana bir misol sifatida O‘zbekiston badiiy gimnastika terma jamoasining 26–28 iyun kunlari Ruminiyaning Kluj-Napoka shahrida o‘tkazilgan Challenge (World Challenge Cup) jahon kubogi bosqichidagi ishtirokini keltirdi.
Bundan tashqari, elchi O‘zbekiston terma jamoasining 18 yoshgacha bo‘lgan qizlar o‘rtasidagi gandbol bo‘yicha jahon chempionatida ishtirok etganiga eʼtibor qaratdi. Musobaqa 2026 yil 29 iyul — 9 avgust kunlari Ruminiyada bo‘lib o‘tgan.
Chobanuga ko‘ra, ikki mamlakat o‘rtasidagi sport muloqoti ancha oldin shakllangan. Muhim voqealardan biri sifatida u Ruminiyaning sport masalalari bo‘yicha davlat kotibi Tomas Moldovanning 2022 yilda O‘zbekistonga tashrifini qayd etdi.
Ruminiyalik diplomatning Toshkent xalqaro yarim marafonida ishtirok etishi O‘zbekiston va Ruminiya o‘rtasidagi sport aloqalari doirasidagi navbatdagi voqea bo‘ldi.
