O‘zbekistonda 315 ming tadbirkor soliq penyasini hisobdan chiqarishi mumkin
Toshkent, O’zbekiston (UzDaily.uz) — O‘zbekistonda 315 mingdan ortiq tadbirkor «Ikkinchi imkoniyat» iqtisodiy amnistiya mexanizmi orqali 2026 yil oxiriga qadar soliq qarzdorligini to‘liq qoplagan taqdirda, hisoblangan penyani hisobdan chiqarish imkoniyatiga ega bo‘ladi. Bu haqda O‘zbekiston Savdo-sanoat palatasi xabar berdi.
Prezidentning PF–175-son farmoniga muvofiq, mazkur chora 2026 yil 1 sentyabr holatiga yuzaga kelgan soliq qarzdorligini 31 dekabrga qadar to‘liq to‘laydigan kichik va o‘rta biznes vakillariga nisbatan tatbiq etiladi.
Ushbu shart bajarilgan taqdirda, tadbirkorlarga hisoblangan penya hisobdan chiqariladi. Bundan tashqari, ularga nisbatan ijro ishlari ham tugatiladi.
Savdo-sanoat palatasi maʼlumotlariga ko‘ra, hozirgi vaqtda 315,2 ming tadbirkorda soliq qarzdorligi mavjud. Uning umumiy hajmi 9,5 trln so‘mni, hisoblangan penya esa 1,5 trln so‘mni tashkil etadi.
Farmonda qo‘shimcha qo‘llab-quvvatlash choralari ham nazarda tutilgan. Soliq hisobotlaridagi xatolarni mustaqil ravishda tuzatib, yil oxiriga qadar qo‘shimcha hisoblangan soliqni to‘lagan tadbirkorlarga penya hisoblanmaydi.
Bundan tashqari, 2019–2025 yillarda to‘plangan, umumiy miqdori 1,6 trln so‘m bo‘lgan ayrim jarima qarzdorliklarini hisobdan chiqarish rejalashtirilgan. Alohida ravishda aylanmadan olinadigan soliq bo‘yicha 39,8 mlrd so‘m miqdoridagi jarima qarzdorligini hisobdan chiqarish ham nazarda tutilgan.
«Ikkinchi imkoniyat» mexanizmi doirasida penyani hisobdan chiqarish huquqiga ega bo‘lish uchun tadbirkor 2026 yil 31 dekabrga qadar soliq qarzdorligini to‘liq qoplashi kerak.
