Polshaning LPP kompaniyasi O'zbekistonda ishlab chiqarishni o'rganadi

Toshkent, O’zbekiston (UzDaily.uz) —  Polshaning LPP kompaniyasi mahalliy korxonalar bilan hamkorlikda O‘zbekistonda mahsulot ishlab chiqarishni yo‘lga qo‘yish imkoniyatini ko‘rib chiqmoqda. Bu masala 25 avgust kuni O‘zbekiston investitsiyalar, sanoat va savdo vaziri o‘rinbosari Akram Aliyevning LPPning xaridlar va ESG bo‘yicha direktori Dorota Yankovska bilan uchrashuvida muhokama qilindi. Bu haqda O‘zbekiston Respublikasi Investitsiyalar, sanoat va savdo vazirligi xabar berdi.

Tomonlar O‘zbekistonning ishlab chiqarish salohiyatidan foydalanish va mahalliy kompaniyalar bilan hamkorlikni rivojlantirish imkoniyatlarini muhokama qildi. Mamlakat hududida mahsulot ishlab chiqarishni tashkil etish uchun zarur shartlarga alohida eʼtibor qaratildi.

Muzokaralar davomida LPPning 2028 yilgacha bo‘lgan strategik rivojlanish rejalari ham ko‘rib chiqildi. Uchrashuv ishtirokchilari kompaniyaning O‘zbekistondagi faoliyatini kengaytirish va yangi istiqbolli loyihalarni amalga oshirish imkoniyatlarini muhokama qildi.

Uchrashuv yakunida Investitsiyalar, sanoat va savdo vazirligi LPPning O‘zbekistondagi faoliyatini kengaytirish hamda qo‘shma loyihalarni amalga oshirishda zarur ko‘mak va amaliy yordam ko‘rsatishga tayyorligini bildirdi.