Toshkent, O’zbekiston (UzDaily.uz) — Farg‘ona viloyati Saudiya Arabistonining Al Sharq Flexible Packaging Factories kompaniyasi bilan qadoqlash materiallari ishlab chiqarish, zamonaviy texnologiyalarni joriy etish va qo‘shma investitsiya loyihalarini amalga oshirish sohalarida hamkorlik imkoniyatlarini o‘rganmoqda.
Hamkorlik masalalari Farg‘ona viloyati hokimi Hayrullo Bozorovning Er-Riyod shahrida kompaniyaning savdo va marketing bo‘yicha bosh menejeri Muhammad Husayn Irfan bilan uchrashuvida muhokama qilindi.
Muzokaralar viloyat rahbarining Saudiya Arabistoniga ishchi tashrifi doirasida bo‘lib o‘tdi.
Tomonlar o‘zaro manfaatli hamkorlik istiqbollari, jumladan, ishlab chiqarish tajribasi va ilg‘or texnologiyalar almashinuvi, shuningdek, qadoqlash mahsulotlarini birgalikda ishlab chiqarishni yo‘lga qo‘yish masalalari yuzasidan fikr almashdi.
1976 yilda tashkil etilgan Al Sharq Flexible Packaging Factories kompaniyasi egiluvchan qadoqlash materiallari ishlab chiqarishga ixtisoslashgan. Korxona polietilen va boshqa polimer plyonkalar, shuningdek, sanoat mahsulotlarining turli xillari uchun qadoqlar ishlab chiqaradi.
Taqdim etilgan maʼlumotlarga ko‘ra, ishlab chiqarish jarayonida Yevropa texnologiyalaridan foydalaniladi. Kompaniya mahsulotlari xalqaro sifat standartlariga javob beradi hamda ichki va tashqi bozorlarga yetkazib beriladi.
Hayrullo Bozorov qadoqlash sanoatining ishlab chiqarish va savdo zanjirlaridagi ahamiyatini taʼkidladi. Uning so‘zlariga ko‘ra, sifatli qadoqlash materiallari mahsulot xususiyatlarini saqlash, uning raqobatbardoshligini oshirish va tashqi bozorlarga chiqish imkoniyatlarini kengaytirishga yordam beradi.
Uchrashuv davomida Saudiya Arabistoni vakillariga Farg‘ona viloyatining sanoat va investitsiya salohiyati, shuningdek, hududda tadbirkorlik faoliyati uchun yaratilgan sharoitlar haqida ham maʼlumot berildi.
Takliflardan biri Al Sharq Flexible Packaging Factories kompaniyasi bilan Farg‘ona viloyatining Buvayda tumanida faoliyat yurituvchi Lion Print korxonasi o‘rtasida hamkorlik aloqalarini o‘rnatish bo‘ldi.
Tomonlar qadoqlash mahsulotlarini ishlab chiqarish bo‘yicha qo‘shma loyihalarni amalga oshirish imkoniyatlarini ko‘rib chiqdi.
Viloyat hokimi Saudiya kompaniyasi vakillarini Farg‘onaga tashrif buyurishga taklif qildi. Tashrif davomida ular mahalliy korxonalar faoliyati bilan tanishishi va hamkorlik istiqbollarini bevosita joyida baholashi mumkin.
Uchrashuv yakunida tomonlar hamkorlikning istiqbolli yo‘nalishlari bo‘yicha muzokaralarni davom ettirishdan manfaatdor ekanini bildirdi.
