Toshkent, O’zbekiston (UzDaily.uz) — O‘zbekiston va Yaponiya investitsiyaviy hamkorlikni kengaytirish hamda bir qator sohalarda qo‘shma loyihalarni amalga oshirish masalalarini muhokama qildi.
10 oktyabr kuni Toshkentda O‘zbekiston investitsiyalar, sanoat va savdo vaziri Laziz Qudratovning Yositsugu Minagava boshchiligidagi Yaponiya—O‘zbekiston «Ipak yo‘li» jamg‘armasi (JUSRF) delegatsiyasi bilan uchrashuvi bo‘lib o‘tdi.
Uchrashuvda Sakura Global Holding, Sakura Seiki, JA Hokkaido Central Union va Yaponiyaning boshqa tashkilotlari vakillari ham ishtirok etdi.
Tomonlar savdo-iqtisodiy aloqalarni rivojlantirish, Yaponiya kompaniyalarini investitsiya tashabbuslariga jalb qilish va infratuzilma, sog‘liqni saqlash, sanoat, taʼlim hamda turizm sohalarida qo‘shma loyihalarni yo‘lga qo‘yish istiqbollarini ko‘rib chiqdi.
Tibbiyot taʼlimini rivojlantirish va universitet klinikasini tashkil etish masalalariga alohida eʼtibor qaratildi.
Shuningdek, Yaponiya biznesining Samarqanddagi maxsus iqtisodiy zona loyihasida ishtirok etishi, ishlab chiqarishni mahalliylashtirish va davlat-xususiy sheriklik mexanizmlarini kengaytirish imkoniyatlari muhokama qilindi.
Muzokaralar yakunida tomonlar 2024 yil iyul oyida imzolangan o‘zaro anglashuv memorandumi doirasida hamkorlikni davom ettirish niyatini tasdiqladi.
Keyingi bosqichdagi ustuvor vazifalar sifatida to‘g‘ridan-to‘g‘ri ishbilarmonlik aloqalarini mustahkamlash va qo‘shma tashabbuslarni ilgari surish belgilandi.
