IT Park Uzbekistan yoshlarni ish bilan taʼminlash imkoniyatlarini kengaytirmoqda

Toshkent, O’zbekiston (UzDaily.uz) — IT Park Uzbekistan mamlakat bo‘ylab mutaxassislar, talabalar va bitiruvchilarni ish bilan taʼminlash imkoniyatlarini kengaytirib, mahalliy va xalqaro kompaniyalar uchun yagona nomzodlar bazasini shakllantirmoqda.

Ro‘yxatdan o‘tgan ish izlovchilarning rezyumelari tegishli bo‘sh ish o‘rinlari va mutaxassislarga ehtiyoj mavjud bo‘lgan taqdirda kompaniyalarga, jumladan, IT Park Uzbekistan rezidentlariga taqdim etilishi mumkin.

Bazada nomzodlarning kasbiy tajribasi, ixtisosligi, xorijiy tillarni bilishi va afzal ko‘radigan ish formati hisobga olinadi. Tashabbus O‘zbekistonning barcha hududlarini qamrab oladi va ish beruvchilarga nafaqat Toshkentdagi, balki boshqa hududlardagi mutaxassislarni ham ko‘rib chiqish imkonini beradi.

Kompaniyalarning ehtiyoji faqat anʼanaviy IT kasblari bilan cheklanmaydi. Talab yuqori bo‘lgan mutaxassislar qatorida dasturchilar, QA muhandislari, maʼlumotlar bilan ishlash bo‘yicha mutaxassislar va dizaynerlar, shuningdek, marketing, savdo, mijozlarga xizmat ko‘rsatish, moliya, buxgalteriya hisobi va maʼmuriy boshqaruv sohalari xodimlari bor.

BPO va koll-markazlar uchun kadrlar tanlash ham alohida yo‘nalish bo‘lib qolmoqda. Xalqaro bozorlar va xorijiy mijozlar bilan ishlaydigan kompaniyalar xorijiy tillarni biladigan mutaxassislarga ham qiziqish bildirmoqda. Xususan, ingliz, rus, nemis, fransuz, ispan, turk, arab, xitoy, yapon va koreys tillarini biladigan nomzodlarga talab mavjud.

Ish beruvchining talablariga qarab, ish izlovchilarga ofis, gibrid yoki masofaviy ishlash formatlari taklif qilinishi mumkin. Bu hududlardagi mutaxassislar uchun imkoniyatlarni kengaytiradi va kompaniyalarga Toshkentdan tashqari hududlardan ham xodim izlash imkonini beradi.

Nomzodlar bazasini shakllantirish vositalaridan biri Talent Park loyihasidir. Ish izlovchilar maxsus bot orqali rezyume yuborib, o‘z tajribasi, ko‘nikmalari va kasbiy yo‘nalishi haqida maʼlumot ko‘rsatishi mumkin. Mos bo‘sh ish o‘rinlari paydo bo‘lganida, nomzod profili IT Park Uzbekistan rezidentlari hamda yirik mahalliy va xalqaro kompaniyalarga ko‘rib chiqish uchun taqdim etilishi mumkin.

Karyera imkoniyatlari va ochiq vakansiyalar haqidagi dolzarb maʼlumotlar ham loyihaning Telegram-kanalida eʼlon qilib boriladi.

Bazada ro‘yxatdan o‘tish avtomatik ravishda ishga joylashishni anglatmaydi va vakansiya olishni kafolatlamaydi. Shu bilan birga, bu mutaxassislarga o‘z kasbiy profilini ehtimoliy ish beruvchilarga taqdim etish va nomzodlarni keyingi tanlash jarayonida ishtirok etish uchun qo‘shimcha imkoniyat beradi.

Rezyume qoldirish uchun @talentparkbot botidan, dolzarb imkoniyatlar haqida maʼlumot olish uchun esa @talentparkuz Telegram-kanalidan foydalanish mumkin.