Toshkent, O’zbekiston (UzDaily.uz) — O‘zbekiston Qishloq xo‘jaligi vazirligi Tailandning Charoen Pokphand Foods Public Company Ltd. (CPF) kompaniyasi bilan qishloq xo‘jaligi va oziq-ovqat sanoatida investitsiyaviy hamkorlik istiqbollarini muhokama qildi. Bu haqda O‘zbekiston Respublikasi Qishloq xo‘jaligi vazirligi xabar berdi.
Uchrashuvda CPF delegatsiyasiga kompaniyaning Rossiyadagi vakolatxonasi bosh direktori Buri Srina boshchilik qildi. Tomonlar hamkorlik uchun mavjud imkoniyatlar va qo‘shma investitsiya loyihalarini tayyorlash masalalarini ko‘rib chiqdi.
Uchrashuv avvalida CPF vakillari kompaniya faoliyati, uning agrosanoat va oziq-ovqat sohalaridagi tajribasi, xalqaro loyihalari hamda investitsiyaviy faoliyati haqida maʼlumot taqdim etdi. Kompaniyaning Rossiyadagi parrandachilik fabrikasi faoliyatiga ham alohida taqdimot bag‘ishlandi.
Hamkorlikning ustuvor yo‘nalishlari sifatida tomonlar qoramol va parranda uchun ozuqa ishlab chiqarish, parrandachilik va chorvachilikni rivojlantirish, zamonaviy agrotexnologiyalarni joriy etish, shuningdek, biologik xavfsizlik texnologiyalari va tizimlaridan foydalanishni belgiladi.
Uchrashuv yakunlari bo‘yicha ishtirokchilar istiqbolli loyihalar, hamkorlikning ehtimoliy shakllari, investitsiyalar hajmi va zarur resurslarni baholash, shuningdek, tegishli investitsiya tashabbuslarini keyingi bosqichda tayyorlash masalalarini muhokama qildi.
