Toshkent, O’zbekiston (UzDaily.uz) — O‘zbekiston milliy terma jamoasi kapitani Eldor Shomurodov Turkiya chempionatining 5-turida Istanbulning “Bashakshexir” klubi safida dubl qayd etdi.
“Bashakshexir” o‘z maydonida “Genchlerbirligi”ni 4:0 hisobida yirik mag‘lubiyatga uchratdi.
Skev Olsen 9-daqiqada hisobni ochdi. Eldor Shomurodov 33-daqiqada jamoasining ikkinchi golini urdi. U jarima maydoni markazida to‘pni qabul qilib, burilib zarba berdi va raqib darvozasini ishg‘ol qildi.
Uchrashuvning 53-daqiqasida Selke penaltini aniq amalga oshirib, “Bashakshexir”ning ustunligini oshirdi.
Eldor Shomurodov 65-daqiqada ikkinchi golini urdi. U Skev Olsendan uzatma qabul qilib, himoyachilarni ortda qoldirdi va aniq zarba bilan to‘pni darvozaga joyladi.
O‘zbekiston terma jamoasi yarim himoyachisi Abbosbek Fayzullayev uchrashuvning 76-daqiqasida maydonga tushdi.
