Toshkent, O’zbekiston (UzDaily.uz) — O‘zbekiston Tibbiyot va farmatsevtika sohasini rivojlantirish agentligi vakillari 16–18 sentyabr kunlari Xitoyning Shenchjen shahrida bo‘lib o‘tgan CPHI Shenzhen 2026 xalqaro farmatsevtika ko‘rgazmasida ishtirok etdi.
Tadbir doirasida O‘zbekiston tomoni Xitoy va boshqa davlatlarning farmatsevtika kompaniyalari hamda soha vakillari bilan uchrashuvlar o‘tkazdi. Bu haqda O‘zbekiston Tibbiyot va farmatsevtika sohasini rivojlantirish agentligi xabar berdi.
Muzokaralar davomida ishlab chiqarishni mahalliylashtirish, texnologiyalar transferi, qo‘shma korxonalar tashkil etish, yangi ishlab chiqarish loyihalarini amalga oshirish hamda ilmiy-tadqiqot sohasida hamkorlik qilish masalalari muhokama qilindi.
Xorijiy kompaniyalarga O‘zbekiston farmatsevtika sohasining investitsiyaviy imkoniyatlari ham taqdim etildi. Tomonlar istiqbolli loyihalar va ularni amaliy bosqichga o‘tkazish imkoniyatlarini muhokama qildi.
CPHI Shenzhen 2026 ko‘rgazmasi Shenchjen ko‘rgazmalar markazida bo‘lib o‘tdi. U farmatsevtika sanoatining dori vositalari ishlab chiqarish, biotexnologiya, farmatsevtika uskunalari, ishlab chiqarishni intellektuallashtirish va laboratoriya texnologiyalarini qamrab olgan keng yo‘nalishlariga bag‘ishlandi.
O‘zbekistonning ko‘rgazmadagi ishtiroki farmatsevtika bozorining xalqaro ishtirokchilari bilan aloqalarni kengaytirish, shuningdek, amaliy va investitsiyaviy hamkorlikning yangi shakllarini muhokama qilish uchun maydon bo‘lib xizmat qildi.
