Toshkent, O’zbekiston (UzDaily.uz) — O‘zbekiston futzal terma jamoasi Yevropa turnesi doirasidagi ikkinchi o‘rtoqlik uchrashuvida Vengriyaga 2:5 hisobida mag‘lub bo‘ldi.
Uchrashuv 19 sentyabr kuni “Aramis” sport zalida bo‘lib o‘tdi.
O‘zbekiston o‘yinni faol boshladi va birinchi bo‘lib hisobni ochdi. 6-daqiqada Abror Ahmedzyanov gol urdi. Biroq oradan bir daqiqa o‘tib, Mate Kovach hisobni tenglashtirdi.
Birinchi bo‘limning ikkinchi yarmida Vengriya terma jamoasi tashabbusni o‘z qo‘liga oldi. 15-daqiqada Mate Yanosh Suchchak mezbonlarni oldinga olib chiqdi. Keyin Zoltan Salmash va Madyari Chaba Vengriyaning ustunligini oshirdi. Ikkinchi bo‘lim boshida Matyash Kaytar Vengriyaning beshinchi golini urdi.
O‘zbekiston faqat bitta gol bilan javob qaytara oldi. 39-daqiqada Behruz Somiyev raqib darvozasini ishg‘ol qildi. Yakuniy hisob — Vengriya foydasiga 5:2.
Shu tariqa, ikki o‘rtoqlik uchrashuvi natijasiga ko‘ra, jamoalar o‘zaro g‘alabalarni bo‘lishib oldi. Birinchi uchrashuvda O‘zbekiston Ilhomjon Hamroyevning goli evaziga 1:0 hisobida g‘alaba qozongan edi.
Vengriyadagi uchrashuvlardan so‘ng O‘zbekiston terma jamoasi Yevropa turnesini Niderlandiyada davom ettiradi.
Niderlandiya milliy terma jamoasiga qarshi ikkita o‘rtoqlik uchrashuvi 21 va 22 sentyabr kunlariga rejalashtirilgan.
