Toshkent, O’zbekiston (UzDaily.uz) — Yaponiyaning Nagoya shahrida 19 sentyabr kuni XX yozgi Osiyo o‘yinlari — Aichi-Nagoya-2026 musobaqasining ochilish marosimi bo‘lib o‘tdi. Qitʼa musobaqasida O‘zbekiston nomidan 42 ta sport turida ishtirok etadigan 396 nafar sportchi qatnashmoqda.
Ochilish marosimi Mizuho Park Athletic Stadium stadionida o‘tkazildi. O‘yinlarni Yaponiya imperatori Naruxito ochib berdi. Musobaqalar 16 kun davom etadi va 4 oktyabr kuni yakunlanadi.
Marosim «Harmonic Heart Beat» shiori ostida o‘tkazildi. Dasturda O‘yinlar tumori Xonoxon ham ishtirok etdi. Nagoya qalʼasi maketi fonida kabuki teatri aktyori ishtirokida sahna ko‘rinishi namoyish etildi, yaponiyalik skripkachi Xakase Taro esa musiqiy dastur taqdim qildi. Marosim boshlanishidan oldin Yaponiya O‘zini o‘zi mudofaa kuchlarining «Blue Impulse» aviashou guruhi stadion ustidan parvoz qildi.
Marosimda imperator Masako, valiahd shahzoda Akisino rafiqasi bilan, Xalqaro olimpiya qo‘mitasi prezidenti Kirsti Koventri, Osiyo olimpiya kengashi prezidenti shayx Joan bin Hamad Ol Soniy hamda O‘yinlarning tashkiliy qo‘mitasi rahbari, Ayti prefekturasi gubernatori Xideaki Omura ishtirok etdi.
Osiyo o‘yinlarining olovi 1958 va 1994 yillarda qitʼa musobaqalariga mezbonlik qilgan Tokio va Xirosima shaharlaridan olib kelindi.
O‘zbekiston delegatsiyasining bayroqdorlari boks bo‘yicha jahon chempioni To‘rabek Habibullayev va Xanchjou-2022 Osiyo o‘yinlarining qilichbozlik bo‘yicha chempioni Gulistan Perdebayeva bo‘ldi.
O‘zbekiston O‘yinlarda 42 ta sport turida ishtirok etadi. Ularning 36 tasi olimpiya, oltitasi esa olimpiada dasturiga kiritilmagan sport turlaridir. Delegatsiya tarkibida 224 nafar erkak va 172 nafar ayol sportchi bor.
O‘zbekiston terma jamoasi Osiyo o‘yinlarida ilk bor plyaj voleyboli, voleybol, yelkanli sport, skvosh va MMA bo‘yicha ishtirok etadi. Kamondan otish, chim ustidagi xokkey, tennis, serfing, triatlon va skvosh kabi qator sport turlarida sportchilar 2028 yilda Los-Anjelesda bo‘lib o‘tadigan Olimpiya o‘yinlariga litsenziyalar uchun ham kurash olib boradi.
Xanchjoudagi Osiyo o‘yinlarida O‘zbekiston terma jamoasi medallar jadvalida beshinchi o‘rinni egallab, 22 ta oltin, 18 ta kumush va 31 ta bronza medalini qo‘lga kiritgan edi. Aripov sportchilarni ushbu natijani yaxshilashga chaqirdi.
V Paraosiyo o‘yinlari ham Yaponiyada 18–24 oktyabr kunlari bo‘lib o‘tadi. Ularda O‘zbekiston nomidan 11 ta sport turida 153 nafar sportchi ishtirok etadi.
