Toshkent, O’zbekiston (UzDaily.uz) — O‘zbekiston va AQSH radiatsiya va yadroviy xavfsizlik sohasida ikki davlatning tartibga soluvchi organlari o‘rtasida o‘zaro anglashuv memorandumini imzoladi. Hujjat tomonlar o‘rtasida axborot va ekspertlar almashinuvini kengaytirishni nazarda tutadi. Bu haqda Sanoat, radiatsiya va yadroviy xavfsizlik qo‘mitasi axborot xizmati xabar berdi.
Memorandum O‘zbekiston delegatsiyasining Atom energiyasi bo‘yicha xalqaro agentlik (AEXA) Bosh konferensiyasining 70-sessiyasidagi ishtiroki doirasida imzolandi.
Hujjat radiatsiya va yadroviy xavfsizlikni taʼminlash, litsenziyalash va inspeksiya faoliyati, normativ-huquqiy bazani takomillashtirish, favqulodda vaziyatlarga tayyorgarlik ko‘rish va ularga javob qaytarish sohalaridagi hamkorlikni qamrab oladi.
Shuningdek, mutaxassislar malakasini oshirish va ikki davlatning tartibga soluvchi organlari o‘rtasida kasbiy tajriba almashinuvini yo‘lga qo‘yish ham nazarda tutilgan.
O‘zbekiston tomonidan hujjatni Sanoat, radiatsiya va yadroviy xavfsizlik qo‘mitasi raisi A. Rafikov imzoladi. AQSH tomonidan esa AQSH Yadroviy tartibga solish komissiyasi (NRC) raisi X. K. Niyex imzoladi.
Qayd etilishicha, memorandum axborot va ekspertlar hamkorligini rivojlantirishga hamda atom energiyasidan tinch maqsadlarda foydalanishda xavfsizlikni taʼminlashga xizmat qiladi.
