Toshkent, O’zbekiston (UzDaily.uz) — Mozori-Sharif va Shibirg‘on shaharlarida Xorazm viloyati ishbilarmon doiralari vakillari ishtirokida O‘zbekiston–Afg‘oniston biznes-forumi va B2B uchrashuvlari bo‘lib o‘tdi. Bu haqda “Dunyo” AA xabar berdi.
Xorazm viloyati delegatsiyasiga viloyat hokimi o‘rinbosari Alisher Duschanov rahbarlik qildi. Ishtirokchilar tarkibidan qishloq xo‘jaligi, to‘qimachilik va oziq-ovqat sanoati, qurilish materiallari ishlab chiqarish hamda gilamdo‘zlik sohalarida faoliyat yuritayotgan tadbirkorlar o‘rin oldi.
Muzokaralar davomida tomonlar o‘zaro savdo hajmini oshirish va qo‘shma loyihalarni amalga oshirish imkoniyatlarini ko‘rib chiqdi. Ustuvor yo‘nalishlar sifatida qishloq xo‘jaligi, parrandachilik, to‘qimachilik va oziq-ovqat sanoati, shuningdek, qurilish materiallari ishlab chiqarish qayd etildi.
Balx va Jo‘zjon viloyatlarining savdo-investitsiya palatalari o‘zbek hamkorlari bilan iqtisodiy aloqalarni kengaytirish va savdo hajmini oshirishga tayyor ekanini bildirdi.
B2B muzokaralari doirasida ikki davlat ishbilarmon doiralari vakillari qator kelishuvlarni imzoladi. Hujjatlar qishloq xo‘jaligi, to‘qimachilik sanoati, don va un ishlab chiqarish, oziq-ovqat mahsulotlari hamda qurilish materiallari sohalaridagi hamkorlikni qamrab oldi.
Bundan tashqari, tadbirlar doirasida O‘zbekiston va Afg‘oniston ishlab chiqaruvchilarining mahsulotlari ko‘rgazmasi ham o‘tkazildi.
Uchrashuvlar yakunida tomonlar noyabr oyida Balx va Jo‘zjon viloyatlari tadbirkorlarining Xorazm viloyatiga biznes-missiyasini tashkil etishga kelishib oldi. Muzokaralarni davom ettirish va aniq investitsiya loyihalarini kelishish rejalashtirilmoqda.
