Toshkent, O’zbekiston (UzDaily.uz) — Janubiy Koreyaning SaferZone kompaniyasi O‘zbekistonni kiberxavfsizlik infratuzilmasi va maʼlumotlar markazlarini rivojlantirish bo‘yicha mintaqaviy xab sifatida ko‘rib chiqmoqda. Kompaniya keyinchalik Markaziy Osiyo bozorlariga chiqishni rejalashtirmoqda.
ICT WEEK Uzbekistan 2026 doirasida kompaniya vakillari IT Park Uzbekistan bilan O‘zbekistondagi mahalliy faoliyatini rivojlantirish rejalarini muhokama qildi.
IT Park Uzbekistan raqamlashtirish bo‘yicha direktori Farrux Rasulev SaferZone asoschisi va bosh ijrochi direktori Kvon Chang Xun bilan uchrashdi. Tomonlar O‘zbekistonda kiberxavfsizlik infratuzilmasi va maʼlumotlar markazlarini rivojlantirish istiqbollarini ko‘rib chiqdi.
SaferZone O‘zbekistonning IT sektorida o‘z faoliyatini rivojlantirish niyatini bildirdi. Kompaniya Janubiy Koreya biznesining, xususan, DAEWOO kompaniyasining mahalliy bozorga kirish tajribasini misollardan biri sifatida ko‘rib chiqmoqda.
Kompaniya O‘zbekiston bozorining talab va standartlarini hisobga olgan holda IT yechimlarini ishlab chiqish, sertifikatlash va mahalliylashtirish uchun Janubiy Koreyaning texnologik salohiyatidan foydalanishni rejalashtirmoqda. Keyinchalik mamlakatda yaratilgan yechimlar Markaziy Osiyo, Sharqiy Yevropa va Afrika bozorlarida faoliyatni kengaytirish uchun qo‘llanilishi mumkin.
Uchrashuv yakunlari bo‘yicha IT Park Uzbekistan va SaferZone Co., Ltd. keyingi hamkorlikning asosiy yo‘nalishlarini belgilab beruvchi o‘zaro anglashuv memorandumini imzoladi. Kelishuvlarni amalga oshirish doirasida tomonlar O‘zbekistonda mahalliy kompaniya va maʼlumotlar markazini tashkil etish imkoniyatini o‘rganishni rejalashtirmoqda.
Maʼlumotlar markazi IT Park rezidentlari va boshqa kompaniyalarga colocation xizmatlari, bulutli va hisoblash infratuzilmasi, shuningdek, kiberxavfsizlik sohasidagi yechimlarni taqdim etishi mumkin. Keyinchalik ushbu xizmatlar Markaziy Osiyo mamlakatlaridagi mijozlar uchun ham kengaytirilishi mumkin.
SaferZone texnologiyalar transferi va IT yechimlarini ishlab chiqarishni mahalliylashtirish imkoniyatini ham ko‘rib chiqmoqda. Bu rejalar O‘zbekistonda raqamli infratuzilma, axborot xavfsizligi va texnologik sohani rivojlantirish yo‘nalishlari bilan bog‘liq.
SaferZone kompaniyasi 2001 yilda tashkil etilgan bo‘lib, axborot xavfsizligi sohasiga ixtisoslashgan. Uning SaferZone All-in-One platformasi maʼlumotlar sizib chiqishining oldini olish, tovlamachi dasturlar va viruslardan himoya qilish, tarmoq va elektron pochta xavfsizligi, shuningdek, maʼlumotlarni shifrlash uchun yechimlarni birlashtiradi.
Kompaniya mijozlari qatorida Korea Telecom, LG, Samsung va Hyundai-Kia Group nomlari keltirilgan.
Hamkorlik O‘zbekistonda raqamli infratuzilma va maʼlumotlarni himoya qilish sohasidagi yechimlarni rivojlantirishga, shuningdek, Markaziy Osiyo bozorlarida texnologik xizmatlar ko‘rsatish imkoniyatlarini kengaytirishga ko‘maklashishi kutilmoqda.
