Toshkent, O’zbekiston (UzDaily.uz) — «O‘zbekiston temir yo‘llari»ning tarkibiy tuzilmasi “O‘ztemiryo‘lyo‘lovchi” shahar atrofidagi elektr poyezdlari yo‘lovchilari uchun ElektroPoyezd ilovasini ishga tushirdi.
Servis orqali qatnovlar jadvalini ko‘rish va chiptalarni onlayn xarid qilish mumkin. Bu haqda kompaniya matbuot xizmati xabar berdi.
Ilova foydalanuvchilari kerakli qatnovlarni qidirishi, yo‘nalishlar va shahar atrofidagi elektr poyezdlarining batafsil jadvali haqida maʼlumot olishi, shuningdek, o‘z safarlari tarixini ko‘rishi mumkin.
ElektroPoyezd orqali chipta xarid qilinganda, yo‘lovchi QR-kodli elektron hujjatni oladi. Uni internetga ulanish imkoni bo‘lmagan taqdirda ham nazoratchiga taqdim etish mumkin.
Ilovada shahar atrofidagi elektr poyezdlari uchun bir oydan bir yilgacha bo‘lgan muddatga abonement rasmiylashtirish imkoniyati ham mavjud.
Ilova Android 8.0 va undan yuqori versiyalarda ishlaydigan qurilmalar, shuningdek, iOS 15 va undan keyingi versiyalardagi iPhone smartfonlari uchun mavjud.
Raqamli xizmatlarni rivojlantirish Toshkent viloyatida shahar atrofidagi temir yo‘l qatnovlarini kengaytirish fonida amalga oshirilmoqda. 2025 yil sentyabr oyida Prezident Shavkat Mirziyoyev viloyatning barcha tumanlarini poytaxt bilan tezyurar elektr poyezdlari orqali bog‘lashni taʼminlash bo‘yicha topshiriq bergan edi.
Yig‘ilish yakunlari bo‘yicha taʼkidlanganidek, transport imkoniyatlarini yaxshilash hududda uy-joy va infratuzilmani rivojlantirishni rag‘batlantirishi, shuningdek, viloyat aholisining Toshkentda ishlash uchun har kuni qatnashiga sharoit yaratishi kerak.
Iyul oyidan Toshkent — Guliston — Bekobod yo‘nalishida yangi olti vagonli EP3D elektr poyezdi qatnay boshladi.
Sentyabr oyi boshida yangi temir yo‘l tarmog‘i orqali Parkent yo‘nalishida yana bir poyezd qatnovi yo‘lga qo‘yildi.
