Toshkent, O’zbekiston (UzDaily.uz) — 2027 yil 1 yanvardan boshlab O‘zbekistonda davlat pensiyalarini tayinlashda fuqarolarga xizmat ko‘rsatishning ixcham tizimiga o‘tish rejalashtirilmoqda.
G‘aznachilik qo‘mitasi va Pensiya jamg‘armasining tuman hamda shahar bo‘limlari o‘rniga har bir tuman va shaharda bir nafardan uch nafargacha mutaxassis ishlaydigan ofislar tashkil etiladi. Bu haqda 2026 yil 19 oktyabrda Vazirlar Mahkamasining 576-son qarori qabul qilindi.
Islohot g‘aznachilik xizmatlari va pensiya taʼminoti jarayonlarini raqamlashtirish hamda avtomatlashtirishni nazarda tutadi.
Yangi ofislar pensiya tayinlash, holatlar o‘zgarganda pensiya miqdorini qayta hisoblash, pensiya turini o‘zgartirish va to‘lovlarni tashkil etish bilan shug‘ullanadi.
Yangi tizimga o‘tish dastlab tajriba-sinov bosqichidan boshlanadi. 2026 yil oktyabr–dekabr oylarida Andijon, Samarqand va Sirdaryo viloyatlarining ayrim shaharlarida pensiya tayinlash va to‘lash vazifalari Pensiya jamg‘armasining hududiy boshqarmalariga o‘tkaziladi.
Tajriba-sinov o‘tkaziladigan tumanlarda uch nafardan iborat komissiyalar tuziladi. Ular Vazirlar Mahkamasining 2022 yil 13 oktyabrdagi 592-son qarori bilan tasdiqlangan amaldagi nizomga muvofiq davlat pensiyalarini tayinlash va to‘lash masalalarini ko‘rib chiqadi.
Tajriba-sinov yakunlanib, uning natijalari baholangandan so‘ng, 2027 yil 1 yanvardan boshlab ixcham tizimni butun mamlakat bo‘ylab joriy etish rejalashtirilgan.
Islohotlarga O‘zbekiston Prezidentining 2025 yil 26 iyundagi PF-105-son farmoni asos bo‘lgan. Ushbu hujjatda G‘aznachilik qo‘mitasi va Pensiya jamg‘armasining tuman hamda shahar bo‘limlarini tugatish va ular o‘rniga ixcham xizmat ko‘rsatish ofislarini tashkil etish nazarda tutilgan.
Bundan tashqari, O‘zbekistonda Pensiya jamg‘armasi huzurida xalqaro maslahatchilarni jalb qilgan holda loyiha ofisi tashkil etish rejalashtirilmoqda. Uning asosiy vazifalari jamg‘arib boriladigan pensiya tizimini rivojlantirish va uning moliyaviy barqarorligini oshirishdan iborat bo‘ladi.
