Toshkent, O’zbekiston (UzDaily.uz) — O‘zbekiston banklari mijozlarga shartnomalar va moliyaviy xizmatlar haqidagi maʼlumotlarni davlat tilida taqdim etishi shart.
Agar bank buni rad etsa yoki shartnomani faqat boshqa tilda tuzishni taklif qilsa, fuqarolar qoidabuzarlik haqida Markaziy bankka @tajribalabbot Telegram-boti orqali xabar berishlari mumkin.
3030-son nizomning 3 va 7-bandlariga muvofiq, banklar shartnomalarni davlat tilida rasmiylashtirishi va moliyaviy xizmatlar haqidagi maʼlumotlarni shu tilda taqdim etishi kerak. Ikki tomonning roziligi bilan shartnoma boshqa tilda ham tuzilishi mumkin.
Ushbu talab turli bank xizmatlariga, jumladan, kredit rasmiylashtirish va omonat ochishga ham taalluqli.
Mijozlar shartnoma shartlari bilan davlat tilida tanishish va zarur maʼlumotlarni shu tilda olish imkoniyatiga ega bo‘lishi lozim.
Ehtimoliy qoidabuzarlik haqida @tajribalabbot Telegram-boti orqali xabar berish mumkin. Murojaatda bank nomi, muammo yuzaga kelgan xizmat yoki shartnoma haqida maʼlumot va holatning qisqacha bayonini ko‘rsatish tavsiya etiladi. Agar mavjud bo‘lsa, tasdiqlovchi hujjatlar va boshqa materiallarni ham ilova qilish mumkin.
Markaziy bank kelib tushgan maʼlumotlarni ko‘rib chiqadi va qonunchilik talablari buzilgani aniqlangan taqdirda, o‘z vakolatlari doirasida choralar ko‘radi.
Shunday qilib, bank xizmatlari isteʼmolchilari shartnoma shartlari va moliyaviy xizmatlar haqidagi maʼlumotlar bilan davlat tilida tanishish huquqiga ega.
