O‘zbekistonda elektr energiyasi ishlab chiqarish 5,7 foizga oshdi
Toshkent, O’zbekiston (UzDaily.uz) — O‘zbekistonda 2026 yil yanvar–iyun oylarida jami 44 140,8 mln kVt·soat elektr energiyasi ishlab chiqarildi. Bu o‘tgan yilning mos davridagi 41 747,1 mln kVt·soatga nisbatan 5,7 foizga ko‘p. Bu haqda O‘zbekiston Respublikasi Milliy statistika qo‘mitasi xabar berdi.
Shu bilan birga, elektr energiyasi ishlab chiqarish tarkibi o‘zgargan. Yirik korxonalar tomonidan ishlab chiqarilgan elektr energiyasi hajmi 4,6 foizga kamayib, 29 832,8 mln kVt·soatni tashkil etdi. O‘tgan yilning mos davrida bu ko‘rsatkich 31 282,2 mln kVt·soat bo‘lgan.
Kichik tadbirkorlik subyektlari tomonidan ishlab chiqarilgan elektr energiyasi hajmi esa 36,8 foizga oshib, 10 464,9 mln kVt·soatdan 14 308,0 mln kVt·soatga yetdi. Bu mamlakat energetika sohasida kichik biznesning roli ortib borayotganini ko‘rsatadi.
2026 yil yanvar–iyun oylarida yirik korxonalar tomonidan issiqlik energiyasi ishlab chiqarish ham kamaydi. Ushbu ko‘rsatkich 18,1 foizga pasayib, 9 284,7 ming Gkalni tashkil qildi. O‘tgan yilning mos davrida 11 338,0 ming Gkal issiqlik energiyasi ishlab chiqarilgan.
