Toshkent, O’zbekiston (UzDaily.uz) — Namangan viloyati hokimi Shavkatjon Abdurazzoqov Shanghai Construction Group (SCG) kompaniyasining Markaziy Osiyo bo‘yicha bosh direktor o‘rinbosari Lu Veysi bilan uchrashdi. Tomonlar yo‘l qurilishi, transport infratuzilmasi va qurilish sohalarida investitsiya loyihalarini amalga oshirish istiqbollarini muhokama qildi. Bu haqda Namangan viloyati hokimligi xabar berdi.
Uchrashuv davomida hududning yo‘l-transport infratuzilmasini modernizatsiya qilish, avtomobil yo‘llarini qurish va rekonstruksiya qilish, shuningdek, zamonaviy texnologiyalarni joriy etish va xorijiy tajribadan foydalanish masalalari ko‘rib chiqildi.
Tomonlar zamonaviy yondashuvlar asosida yo‘l sohasida yirik loyihalarni amalga oshirish imkoniyatlari yuzasidan fikr almashdi.
Shanghai Construction Group yirik xalqaro qurilish kompaniyalaridan biri bo‘lib, qurilish va muhandislik, infratuzilma hamda shaharsozlik sohalarida ish tajribasiga ega.
Uchrashuvda taʼkidlanganidek, Namangan viloyati transport infratuzilmasini takomillashtirish, avtomobil yo‘llarining sifati va o‘tkazuvchanlik qobiliyatini oshirishga qaratilgan loyihalar hududning investitsiyaviy jozibadorligini yana-da oshirishda muhim ahamiyatga ega.
Muzokaralar yakunida istiqbolli loyihalarni birgalikda ishlab chiqish, investitsiya imkoniyatlarini o‘rganish va hamkorlikni amaliy bosqichga olib chiqish bo‘yicha kelishuvga erishildi.
