Toshkent, O’zbekiston (UzDaily.uz) — Xorazm viloyatida qattiq maishiy chiqindilarni yoqish orqali elektr energiyasi ishlab chiqarish bo‘yicha investitsiya loyihasi amalga oshirilmoqda. Tegishli PQ-328-sonli qarorni O‘zbekiston prezidenti Shavkat Mirziyoyev 2026 yil 14 sentyabrda imzoladi.
Loyiha investor sifatida ishtirok etayotgan Koreyaning Green Hammer Co., Ltd. kompaniyasi ishtirokida amalga oshirilmoqda. Loyiha doirasida xorijiy korxona tashkil etilgan bo‘lib, u loyiha kompaniyasi vazifalarini bajaradi.
Qarorga muvofiq, loyiha kompaniyasi ishlab chiqarilgan elektr energiyasini “O‘zenergosotish” AJga 30 yil davomida kafolatlangan tarzda sotadi. O‘z navbatida, “O‘zenergosotish” ushbu davr mobaynida elektr energiyasini milliy valyutada xarid qilish majburiyatini oladi.
Elektr stansiyasini yagona elektr tarmog‘iga ulash uchun loyiha kompaniyasi «O‘zbekiston milliy elektr tarmoqlari» AJ tomonidan berilgan texnik shartlar asosida zarur havo elektr uzatish liniyalari va tegishli elektr infratuzilmasini quradi. Obyektlar foydalanishga topshirilganidan so‘ng ular ushbu kompaniyaga topshiriladi.
Elektr stansiyasi ishga tushirilishidan oldin loyiha kompaniyasi «Milliy dispetcherlik markazi» DUK va «O‘zbekiston milliy elektr tarmoqlari» AJ bilan birgalikda stansiyaning elektr energetika tizimiga taʼsiri bo‘yicha texnik xulosa tayyorlaydi. Ushbu xulosa asosida tarmoqqa ulanishning yakuniy shartlari kelishib olinadi.
Agentlik 30 yil davomida belgilangan hajmda qattiq maishiy chiqindilarni loyiha kompaniyasiga kafolatlangan tarzda yetkazib beradi.
Qurilish davrida majburiyatlarning lozim darajada bajarilishini taʼminlash maqsadida loyiha kompaniyasi 7 mln dollar miqdorida birinchi darajali bank kafolatini taqdim etadi.
