Toshkent, O’zbekiston (UzDaily.uz) — Oliy Majlis Qonunchilik palatasida 29 sentyabr kuni bolalarni zo‘ravonlikning barcha shakllaridan himoya qilish tizimini takomillashtirishga qaratilgan qonun loyihasi bo‘yicha ishchi guruh yig‘ilishi bo‘lib o‘tdi. Bu haqda parlament quyi palatasi matbuot xizmati xabar berdi.
Muhokamada Demokratik institutlar va fuqarolik jamiyatini rivojlantirish masalalari qo‘mitasi huzuridagi Jamoatchilik kengashi aʼzolari, shuningdek, jamoatchilik vakillari ishtirok etdi.
Ishtirokchilar qonun loyihasida belgilangan normalar, ularni amaliyotda qo‘llash masalalari, bolalarni zo‘ravonlikdan himoya qilish sohasida mavjud muammolar va ularni hal etishning ehtimoliy yo‘llarini ko‘rib chiqdi. Jamoatchilik vakillari hujjatni yana-da takomillashtirish bo‘yicha o‘z takliflarini bildirdi.
Qonunchilik palatasining tegishli qo‘mitasi raisi Gulruh Agzamova qonun loyihasini ishlab chiqish zarurati bolalarni zo‘ravonlikning barcha shakllaridan himoya qilish, bunday qilmishlar uchun javobgarlikni kuchaytirish va huquqiy kafolatlarni mustahkamlash vazifalari bilan bog‘liq ekanini taʼkidladi.
Uning so‘zlariga ko‘ra, qonun loyihasi avval parlament fraksiyalari yig‘ilishlarida va yalpi majlisda muhokama qilingan hamda birinchi o‘qishda konseptual jihatdan maʼqullangan. Hujjat ustidagi keyingi ishlarda ularning fikr va takliflarini inobatga olish maqsadida ishchi guruh yig‘ilishiga Jamoatchilik kengashi aʼzolari taklif etilgan.
Bloger Shahnoza Soatova qonun loyihasi ustidagi ishni faqat jazoni kuchaytirish masalalari bilan cheklab qo‘ymaslik zarurligini taʼkidladi. Uning fikricha, hujjatni takomillashtirishda bolalarga nisbatan zo‘ravonlikning oldini olish mexanizmlariga alohida eʼtibor qaratish lozim.
Soatova jazoni kuchaytirish bo‘yicha jamoatchilik talabi adolatni taʼminlash istagi bilan bog‘liq ekanini, biroq huquqiy normalarning samaradorligi ularning amalda qo‘llanilishi va javobgarlikning muqarrarligiga ham bog‘liqligini taʼkidladi.
Jamoatchilik kengashi aʼzosi Sattor Rahmatov qonun loyihasining birinchi o‘qishda konseptual jihatdan qabul qilinishini muhim qadam deb atadi. U bolalarga nisbatan nazarda tutilgan maxsus himoya amaliyotda qay darajada taʼminlanayotganini baholash zarurligini taʼkidladi.
Uning so‘zlariga ko‘ra, bolalarni himoya qilish nafaqat davlat organlarining, balki butun jamiyatning vazifasidir.
U taʼlim muassasalarida bolalar xavfsizligiga, jumladan, maktablar hududiga kirish va chiqishni nazorat qilish hamda taʼlim olish uchun xavfsiz muhitni shakllantirishga alohida eʼtibor qaratishni taklif qildi.
Rahmatov bolalarga nisbatan zo‘ravonlik uchun javobgarlikni kuchaytirish choralari bilan bir qatorda masʼul idoralar faoliyatini muvofiqlashtirish va jamoatchilik ishtirokining muhimligini ham qayd etdi.
Yig‘ilish yakunlariga ko‘ra, ishchi guruh bildirilgan takliflarni o‘rganish va qonun loyihasi normalarini takomillashtirish bo‘yicha ishlarni davom ettiradi.
