Toshkent, O’zbekiston (UzDaily.uz) — Toshkent xalqaro aeroportida bojxona xodimlari Dubaydan kelgan uch nafar yo‘lovchi tomonidan 14 ta yangi iPhone smartfonini noqonuniy olib kirishga urinish holatlarini aniqladi. Bu haqda “Toshkent-AERO” IBK xabar berdi.
20–22 sentyabr kunlari «Toshkent xalqaro aeroporti» chegara bojxona posti xodimlari yo‘lovchilardan sakkizta iPhone 18 va oltita iPhone 17 smartfonini aniqladi. Deklaratsiya qilinmagan qurilmalarning umumiy qiymati 227 mln so‘mni tashkil etgan.
Bojxona organlari maʼlumotlariga ko‘ra, yo‘lovchilar mobil qurilmalarni og‘zaki so‘rov jarayonida ham, yo‘lovchining bojxona deklaratsiyasida ham ko‘rsatmagan. Mazkur holatlar bo‘yicha tekshiruvlar davom etmoqda.
Amaldagi tartibga ko‘ra, jismoniy shaxslar shaxsiy ehtiyojlari uchun ikkitagacha mobil qurilmani olib kirishi mumkin. Agar olib kirilayotgan tovarlar qiymati belgilangan bojsiz olib kirish meʼyoridan oshsa, meʼyordan ortiq qismi uchun tovar qiymatining 30 foizi miqdorida yagona bojxona to‘lovi undiriladi.
Xorijdan olib kirilayotgan mobil qurilmalar yo‘lovchining bojxona deklaratsiyasida ko‘rsatilishi kerak. Keyinchalik ushbu deklaratsiya qurilmani UZIMEI tizimida ro‘yxatdan o‘tkazish uchun asos sifatida qo‘llaniladi.
Bojxona organlari telefonni mamlakatga kirish vaqtida deklaratsiya qilishda 30 foizlik yagona bojxona to‘lovi faqat belgilangan bojsiz olib kirish meʼyoridan ortiq bo‘lgan qiymat qismiga nisbatan qo‘llanilishini ham eslatib o‘tdi.
Qurilma bojxona nazoratini chetlab o‘tib olib kirilgan taqdirda, to‘lov telefonning to‘liq qiymatidan kelib chiqib hisoblanadi.
2026 yil boshidan buyon “Toshkent-AERO” IBK xodimlari umumiy qiymati 7,8 mlrd so‘m bo‘lgan 162 ta mobil qurilmaning noqonuniy olib kirilishining oldini oldi.
Xorijdan qaytib kelayotgan fuqarolarga olib kirilayotgan barcha mobil qurilmalarni yo‘lovchining bojxona deklaratsiyasida ko‘rsatish tavsiya etildi.
