Toshkent, O’zbekiston (UzDaily.uz) — O‘zbekiston Osiyo infratuzilmaviy investitsiyalar banki (OTIIB) bilan keyingi hamkorlikning ustuvor yo‘nalishlarini belgiladi. Ular qatoriga loyihalarni tayyorlash sifatini oshirish, transchegaraviy infratuzilmani rivojlantirish va xususiy kapitalni jalb qilishni kengaytirish kiradi. Bu haqda O‘zbekiston Investitsiyalar, sanoat va savdo vazirligi xabar berdi.
Investitsiyalar, sanoat va savdo vaziri Laziz Qudratov Qatar Davlatida o‘tkazilayotgan OTIIBning yillik yig‘ilishida O‘zbekiston pozitsiyasini taqdim etdi. Vazir bank faoliyatini yana-da rivojlantirishga bag‘ishlangan boshqaruvchilar davra suhbatida ishtirok etdi.
Taʼkidlanganidek, 111 ta aʼzo davlatni birlashtirgan OTIIB faoliyatining dastlabki o‘n yili davomida infratuzilma tashabbuslarini amalga oshirish uchun institutsional va moliyaviy asos shakllantirildi. O‘zbekiston tomonining fikricha, yangi bosqichda asosiy eʼtibor moliyalashtirilayotgan loyihalarning amaliy samarasi va ularning ishtirokchi mamlakatlarni barqaror rivojlantirishga taʼsiriga qaratilishi lozim.
Ustuvor yo‘nalishlardan biri sifatida loyihalarni tayyorlash sifatini oshirish qayd etildi. Taʼkidlanishicha, dastlabki bosqichlarda texnik, moliyaviy va tashkiliy parametrlarni yana-da batafsil ishlab chiqish tashabbuslarni keyinchalik amalga oshirishni tezlashtirishi, mablag‘lardan foydalanish samaradorligini oshirishi va qo‘shimcha kapitalni jalb qilish uchun sharoit yaratishi mumkin.
Shu munosabat bilan O‘zbekiston istiqbolli loyihalarni shakllantirish bosqichida OTIIB tomonidan qo‘llab-quvvatlashni kengaytirish muhimligini taʼkidladi.
Mintaqaviy o‘zaro bog‘liqlik masalasiga ham alohida eʼtibor qaratildi. O‘zbekiston OTIIBning transport, energetika va suv infratuzilmasi sohasidagi transchegaraviy loyihalarda ishtirokini kengaytirish tarafdori ekanini bildirdi. Bunday tashabbuslar mamlakatlar va mintaqalar o‘rtasida savdoni rivojlantirish hamda iqtisodiy aloqalarni mustahkamlashga xizmat qilishi mumkin.
Yana bir yo‘nalish sifatida OTIIBning nodavlat moliyalashtirish hajmini oshirish va infratuzilma loyihalarini xususiy investorlar bilan birgalikda amalga oshirish qayd etildi. O‘zbekiston tomonining fikricha, bunday yondashuv investitsiyalar ko‘lamini faqat davlat moliyalashtirishi bilan cheklanib qolmasdan kengaytirish imkonini beradi.
Shuningdek, O‘zbekiston hamkor davlatlar bilan o‘zaro hamkorlik tezkorligini oshirish va loyihalarni qo‘llab-quvvatlash sifatini yaxshilash maqsadida OTIIBning bevosita mintaqalarda yana-da faol ishtirok etishi muhimligini taʼkidladi.
O‘zbekiston OTIIB bilan keyingi hamkorlikni davom ettirishga va bankning «Ertangi infratuzilma» strategik missiyasiga sodiqligini tasdiqladi.
