Toshkent, O’zbekiston (UzDaily.uz) — “O‘zto‘qimachiliksanoat” uyushmasi Xitoyning Xinjiang Yinlong International Agricultural Cooperation Co., Ltd. kompaniyasi vakillari bilan muzokaralar o‘tkazdi.
Tomonlar O‘zbekiston to‘qimachilik sanoatida savdo aloqalarini kengaytirish, investitsiyalarni jalb qilish va qo‘shma loyihalarni amalga oshirish imkoniyatlarini ko‘rib chiqdi.
Uchrashuv davomida Xitoy kompaniyasi O‘zbekistonda ishlab chiqarilgan mahsulotlarni import qilish, shuningdek, mamlakat hududida o‘z faoliyatini yo‘lga qo‘yish va qo‘shma ishlab chiqarish tashabbuslarini rivojlantirishga qiziqish bildirdi.
Xitoy tomoni vakillariga faoliyati vaqtincha to‘xtatilgan amaldagi korxonalarga investitsiya kiritish imkoniyatini ko‘rib chiqish taklif etildi. Kutilishicha, investitsiyalar ushbu korxonalar faoliyatini qayta tiklash va mavjud ishlab chiqarish quvvatlaridan foydalanish samaradorligini oshirish imkonini beradi.
Muzokara ishtirokchilari investitsiya salohiyatini o‘rganish va istiqbolli loyihalarni tayyorlash bo‘yicha keyingi qadamlarni ham muhokama qildi.
Uchrashuv O‘zbekiston va Xitoy o‘rtasidagi savdo-iqtisodiy hamkorlikni, jumladan, to‘qimachilik ishlab chiqarishi sohasidagi aloqalarni kengaytirishga qaratilgan ishlar doirasida o‘tkazildi.
