Toshkent, O’zbekiston (UzDaily.uz) — O‘zbekistonlik shifokor Hasan Kamilov Toshkentdan Seulga uchib ketayotgan samolyot bortida ahvoli keskin yomonlashgan yo‘lovchi ayolga tibbiy yordam ko‘rsatdi.
Ayol shok alomatlari bilan og‘ir ahvolda bo‘lgan. Shifokorning aralashuvi uning hayotini saqlab qolishga yordam berdi. Bu haqda O‘zbekiston Respublikasi Sog‘liqni saqlash vazirligi matbuot xizmati xabar berdi.
Hodisa parvoz vaqtida sodir bo‘lgan. O‘shanda ekipaj yo‘lovchilardan tibbiyot mutaxassisi yordami kerakligi haqida murojaat qilgan. Kamilov zudlik bilan ayolning oldiga borib, shoshilinch tibbiy yordam ko‘rsatishni boshlagan.
Vazirlik maʼlumotiga ko‘ra, yo‘lovchi ayolning tana harorati pasaygan va terisi ko‘kargan. Shifokor yordam ko‘rsatish uchun o‘zi bilan olib yurgan shoshilinch tibbiy yordam vositalaridan, shuningdek, bort kuzatuvchilari taqdim etgan kislorod niqobi va uskunalardan foydalangan.
Kamilov Samarqanddagi xususiy klinikaga rahbarlik qiladi va Toshkent davlat tibbiyot universiteti mustaqil izlanuvchisi hisoblanadi. Ayni paytda u Koreya Respublikasida bo‘lib, Chxunbuk universitetida malaka oshirmoqda.
Hodisadan so‘ng shifokor O‘zbekiston Sog‘liqni saqlash vazirligi matbuot xizmatiga intervyu berdi. U sodir bo‘lgan voqeani qahramonlik emas, balki kasbiy burchini bajarish sifatida baholashini taʼkidladi.
«Bu qahramonlik emas, balki shifokorlik burchimiz va har kungi mashaqqatli mehnatimizning bir qismidir», — dedi Kamilov.
Sog‘liqni saqlash vazirligi tibbiy yordam ko‘rsatilganidan keyin yo‘lovchi ayolning ahvoli haqida qo‘shimcha maʼlumot bermadi.
