Toshkent, O’zbekiston (UzDaily.uz) — Ustyurt mintaqasining markaziy qismida olib borilgan geologik qidiruv ishlari natijasida yangi Qoratog‘ gaz-kondensat koni ochildi. Bu haqda “O‘zbekneftegaz” AJ xabar berdi.
Qoratog‘ maydoni maʼmuriy jihatdan Qoraqalpog‘iston Respublikasining Mo‘ynoq tumanida joylashgan. Qidiruv ishlari doirasida bu yerda chuqurligi 4 860 metr bo‘lgan №1 quduq qazildi.
3 oktyabr kuni quduqni sinash jarayonida 3 273–3 213 metr chuqurlikdagi quyi yura yotqiziqlaridan tabiiy gaz va kondensatning sanoat miqyosidagi oqimi olindi. Sinov natijalariga ko‘ra, yangi gaz-kondensat koni ochilgani tasdiqlandi.
Qoratog‘ maydonidagi keyingi ishlar joriy yil oxiriga qadar davom ettiriladi. Rejaga ko‘ra, bu yerda №2 qidiruv qudug‘ini burg‘ilash ishlarini yakunlash, shuningdek, №3 va №4 qidiruv-razvedka quduqlarini burg‘ilashga kirishish rejalashtirilgan.
“O‘zbekneftegaz” maʼlumotlariga ko‘ra, Qoratog‘ maydonida olib borilgan geologik qidiruv ishlaridan olingan natijalar Ustyurt mintaqasida uglevodorodlarning chuqur qatlamlarini o‘rganishning yangi istiqbolli yo‘nalishlarini aniqlash uchun imkoniyat yaratadi.
