Toshkent, O’zbekiston (UzDaily.uz) — O‘zbekiston va Xitoy tibbiy buyumlarni tartibga solish, jumladan, ularni davlat ro‘yxatidan o‘tkazish, ekspertizadan o‘tkazish, shuningdek, sifati va xavfsizligini baholash masalalarini muhokama qildi.
Uchrashuv Sog‘liqni saqlash vazirligi huzuridagi «Farmatsevtika mahsulotlari xavfsizligi markazi» davlat muassasasida bo‘lib o‘tdi. Unda markaz mutaxassislari, muassasa direktorining birinchi o‘rinbosari Nozim Berdiyev boshchiligidagi vakillar, Xitoy tibbiyot sanoati assotsiatsiyasi (CAMDI) hamda Xitoyning ishlab chiqaruvchi kompaniyalari vakillari ishtirok etdi.
Uchrashuv ishtirokchilariga O‘zbekistonda tibbiy buyumlar muomalasini tartibga soluvchi qonunchilik talablari taqdim etildi.
Tibbiy buyumlarni davlat ro‘yxatidan o‘tkazish tartib-taomillari, tartibga solish ekspertizasi hamda mahsulotlarning belgilangan sifat va xavfsizlik talablariga muvofiqligini baholashga alohida eʼtibor qaratildi.
Tomonlar tibbiy buyumlar sohasida zamonaviy texnologiyalarni rivojlantirish va tartibga solish masalalari yuzasidan ham fikr almashdi.
Muhokama qilingan masalalar qatorida xalqaro tajribani o‘rganish hamda O‘zbekiston va Xitoyning ixtisoslashgan tashkilotlari o‘rtasida amaliy hamkorlikni kengaytirish istiqbollari ham bo‘ldi.
Xitoy tibbiyot sanoati assotsiatsiyasi 1991 yilda tashkil etilgan. U tibbiy buyumlarni ishlab chiqish, ishlab chiqarish, sinovdan o‘tkazish va sertifikatlash, shuningdek, sohaviy taʼlim yo‘nalishlarida faoliyat yurituvchi qariyb 4 ming ishtirokchini birlashtiradi.
CAMDI Xitoyda tibbiy buyumlar sanoatini rivojlantirish, innovatsiyalarni qo‘llab-quvvatlash va ushbu sohada xalqaro aloqalarni kengaytirishda ishtirok etadi.
