Toshkent, O’zbekiston (UzDaily.uz) — “Ipoteka-bank” 2026 yil yanvar–sentyabr oylari yakunlariga ko‘ra, 2,07 trln so‘m sof foyda oldi. Bu 2025 yilning shu davridagi 102,5 mlrd so‘mlik foydaga nisbatan 19,2 barobar ko‘pdir. Bu haqda Kapdepo investitsiya banki “Ipoteka-bank”ning moliyaviy hisobotlariga tayanib xabar berdi.
Uchinchi chorakda, yaʼni iyul–sentyabr oylarida, bank 683,6 mlrd so‘m foyda ko‘rdi. Bu o‘tgan yilning shu davriga nisbatan 38,1 foizga ko‘pdir. To‘qqiz oy davomida bankning jami daromadlari 8,9 foizga oshib, 12,3 trln so‘mga yetdi.
Foydaning o‘sishi kredit xatarlarining kamayishi bilan birga kechdi. Sentyabr oyi oxiriga kelib, kreditlar va lizing bo‘yicha ehtimoliy yo‘qotishlar bahosi yillik hisobda 73,1 foizga kamayib, 929,2 mlrd so‘mni tashkil etdi.
Muammoli aktivlarning qisqarishi bankka foizli daromadlar ko‘rsatkichini sezilarli darajada yaxshilash imkonini berdi. Sof foizli daromadlar 2025 yilning uchinchi choragidagi manfiy 767,2 mlrd so‘mdan ijobiy 1,9 trln so‘mga yetdi.
Bankning kredit portfeli 2026 yil 1 sentyabr holatiga ko‘ra, 36,6 trln so‘mni tashkil etdi. Bu bir yilda 2,7 foizga o‘sishni anglatadi. Muammoli kreditlar (NPL) ulushi esa 6,1 foizdan 3 foizga tushdi.
“Ipoteka-bank” aktivlari 15,5 foizga o‘sib, 58,5 trln so‘mga yetdi. Bank kapitali esa 24,6 foizga ko‘payib, 9,3 trln so‘mni tashkil qildi.
