Toshkent, O’zbekiston (UzDaily.uz) — O‘zbekiston va Xitoy sunʼiy intellekt, raqamli iqtisodiyot va maʼlumotlar infratuzilmasi sohalarida ekspertlar hamkorligini davom ettirishga kelishib oldi.
Toshkentda «Raqamli hamkorlik: sunʼiy intellekt va yangi avlod maʼlumotlar iqtisodiyoti» mavzusida O‘zbekiston — Xitoy ekspertlar kengashining ikkinchi yig‘ilishi bo‘lib o‘tdi.
Uchrashuv yakunlari bo‘yicha O‘zbekiston Prezidenti huzuridagi Strategik va mintaqalararo tadqiqotlar instituti (SMTI) hamda Xitoy Ijtimoiy fanlar akademiyasining Rossiya, Sharqiy Yevropa va Markaziy Osiyo instituti 2027 yil uchun kengashning ish rejasini imzoladi. Bu haqda “Dunyo” axborot agentligi xabar berdi.
Yig‘ilishda ikki mamlakatning tahliliy, tadqiqot va taʼlim tashkilotlari rahbarlari hamda vakillari, shuningdek, davlat idoralari va diplomatik vakolatxonalar xodimlari ishtirok etdi.
O‘zbekiston tomonidan Jahon iqtisodiyoti va diplomatiya universiteti, Iqtisodiy tadqiqotlar va islohotlar markazi, Raqamli texnologiyalar va sunʼiy intellektni rivojlantirish ilmiy-tadqiqot instituti vakillari qatnashdi. Xitoy tomonidan esa, jumladan, Xitoy Ijtimoiy fanlar akademiyasining ixtisoslashgan institutlari vakillari ishtirok etdi.
Ishtirokchilar raqamli transformatsiya, sunʼiy intellekt, maʼlumotlarni qayta ishlash infratuzilmasini rivojlantirish va malakali kadrlar tayyorlash sohalaridagi hamkorlik istiqbollarini ko‘rib chiqdi. Sunʼiy intellektni sanoat, qishloq va suv xo‘jaligi, davlat boshqaruvi hamda iqtisodiyotning boshqa tarmoqlarida qo‘llash masalalariga alohida eʼtibor qaratildi.
Ekspertlar maʼlumotlarni qayta ishlash markazlarini tashkil etish, raqamli xizmatlar ko‘lamini kengaytirish, normativ-huquqiy yondashuvlarni takomillashtirish va kiberxavfsizlik sohasidagi hamkorlikni ham muhokama qildi.
Texnologik imkoniyatlar bilan bir qatorda, ishtirokchilar shaxsiy maʼlumotlarni himoya qilish, sunʼiy intellektdan axloqiy tamoyillar asosida foydalanish, mehnat bozoridagi o‘zgarishlar va ilg‘or texnologiyalardan foydalanish imkoniyatlarining notekis taqsimlanishi kabi masalalarni hisobga olish zarurligini taʼkidladi.
Yig‘ilish materiallarida keltirilgan xalqaro ekspertlar baholariga ko‘ra, 2030 yilga kelib sunʼiy intellektning jahon iqtisodiyotiga qo‘shadigan hissasi 20 trln dollarga yetishi mumkin.
Raqamli iqtisodiyotning jahon yalpi ichki mahsulotidagi ulushi allaqachon 17 foizdan oshgan.
O‘zbekiston «Raqamli O‘zbekiston — 2030» strategiyasi va 2021–2030 yillarga mo‘ljallangan Sunʼiy intellektni rivojlantirish strategiyasi doirasida milliy raqamli ekotizimni rivojlantirmoqda. 2025 yilda mamlakatning raqamli xizmatlar eksporti hajmi taxminan 1 mlrd dollarga yetdi.
Shuningdek, mamlakatda hisoblash quvvatlari va maʼlumotlarni qayta ishlash infratuzilmasini rivojlantirish bo‘yicha loyihalar amalga oshirilmoqda. Jumladan, 2026 yil iyun oyida IT Park hududida quvvati 12 MVt bo‘lgan “yashil” maʼlumotlarni qayta ishlash markazini qurishni moliyalashtirish to‘g‘risida kelishuv imzolangan.
Xitoyning hisoblash infratuzilmasini rivojlantirish, intellektual yechimlarni joriy etish va raqamli iqtisodiyotni shakllantirish borasidagi tajribasi O‘zbekiston uchun qiziqish uyg‘otmoqda. Ikki tomonlama hamkorlikning qo‘shimcha istiqbollari raqamli o‘zaro bog‘liqlikni, texnologik almashinuvni va innovatsion hamkorlikni rivojlantirishga qaratilgan «Raqamli ipak yo‘li» tashabbusi bilan ham bog‘liq.
Xitoy tomoni O‘zbekistonning raqamli infratuzilma va milliy innovatsion ekotizimni rivojlantirish borasidagi yutuqlarini yuqori baholadi hamda professional aloqalarni kengaytirish va istiqbolli tashabbuslar ustida birgalikda ishlashga qiziqish bildirdi.
O‘zbekiston — Xitoy ekspertlar kengashi 2024 yil oktyabr oyida SMTI va Xitoy Ijtimoiy fanlar akademiyasining Rossiya, Sharqiy Yevropa va Markaziy Osiyo instituti o‘rtasidagi memorandum asosida tashkil etilgan. Birinchi yig‘ilish 2025 yil 22 martda Pekinda bo‘lib o‘tgan va iqlim o‘zgarishi, ekologik hamkorlik hamda “yashil” texnologiyalar masalalariga bag‘ishlangan.
Joriy uchrashuv yakunlari bo‘yicha tomonlar kengashning uchinchi yig‘ilishini Pekinda o‘tkazishga ham kelishib oldi.
