Toshkent, O’zbekiston (UzDaily.uz) — O‘zbekiston Sanoat kooperatsiyasi va davlat xaridlari agentligining uch nafar vakili Koreya Respublikasida elektron davlat xaridlarini tashkil etish masalalari bo‘yicha malaka oshirmoqda.
10 kundan ortiq davom etadigan o‘quv dasturi 11–24 oktyabr kunlari Koreya xalqaro hamkorlik agentligi (KOICA) va Tedjon universiteti tomonidan tashkil etilgan. Dastur Mustaqil Davlatlar Hamdo‘stligi mamlakatlaridan kelgan davlat xaridlari sohasi mutaxassislarining malakasini oshirishga qaratilgan.
Ishtirokchilar Koreyaning davlat xaridlari tizimi va ushbu sohaga raqamli vositalarni joriy etish tajribasini o‘rganmoqda. Jumladan, dastur doirasida Koreya Respublikasi Davlat xaridlari xizmati (PPS) faoliyati, xarid jarayonlarini tashkil etish tamoyillari va ularni tartibga solish mexanizmlari bilan tanishish nazarda tutilgan.
Koreyaning davlat xaridlari bo‘yicha yagona elektron platformasi — KONEPS tizimiga alohida eʼtibor qaratilmoqda. Mutaxassislar uning texnik imkoniyatlari va amaliyotda qo‘llanilishini ko‘rib chiqmoqda, shuningdek, elektron savdolarni tashkil etish va xarid jarayonlarining shaffofligini taʼminlash yondashuvlarini o‘rganmoqda.
Dasturdan davlat xaridlarida sunʼiy intellekt va katta maʼlumotlar (Big Data) texnologiyalaridan foydalanish masalalari ham o‘rin olgan. Ishtirokchilar xarid jarayonlari samaradorligini oshirish, raqobatni rivojlantirish va korrupsiya xavflarini kamaytirish mexanizmlari bilan tanishmoqda.
Bundan tashqari, o‘quv dasturi elektron davlat xaridlari infratuzilmasini takomillashtirish hamda xalqaro tajribani O‘zbekiston sharoitiga moslashtirish imkoniyatlarini ham qamrab olgan.
Kutilishicha, olingan bilimlar mamlakatda davlat xaridlari tizimini yana-da rivojlantirish, raqamli texnologiyalardan foydalanish ko‘lamini kengaytirish, shuningdek, xarid jarayonlarining shaffofligi va samaradorligini oshirishga xizmat qiladi.
Dastur, shuningdek, ushbu sohada xalqaro hamkorlikni mustahkamlashga qaratilgan.
