Toshkent, O’zbekiston (UzDaily.uz) — O‘zbekiston va Serbiya basketbol hamda voleybol sohalaridagi hamkorlikni kengaytirish, jumladan, sportchilar va murabbiylar tayyorlash bo‘yicha hamkorlik qilishga kelishib oldi.
Onlayn muzokaralar davomida Serbiya tomoni ushbu sport turlarini rivojlantirishga ko‘maklashish uchun O‘zbekistonga mutaxassislar yuborishga tayyorligini bildirdi. Bu haqda “Dunyo” axborot agentligi xabar berdi.
Muzokaralarda O‘zbekiston sport vaziri o‘rinbosari Shahrillo Mahmudov, Serbiya sport vaziri Zoran Gaich, ikki mamlakat basketbol va voleybol federatsiyalari vakillari, shuningdek, qarorgohi Budapeshtda joylashgan O‘zbekistonning Serbiyadagi elchisi Oybek Shahavdinov ishtirok etdi.
Tomonlar professional tajriba almashish, sportchilarni tayyorlash tizimini takomillashtirish va murabbiylar malakasini oshirish imkoniyatlarini muhokama qildi.
Serbiyalik mutaxassislarni jalb qilish O‘zbekistonda basketbol va voleybolni rivojlantirishga yordam berishi kutilmoqda.
Erishilgan kelishuvlar ikki tomonlama sport aloqalarini mustahkamlash, murabbiylarning professional mahoratini oshirish va O‘zbekiston milliy terma jamoalarini rivojlantirishga qaratilgan.
